რეგიონული განვითარებისა და ინფრასტრუქტურის ყოფილი მინისტრი მამუკა მდინარაძე აცხადებს, რომ ექსპრემიერ ირაკლი ღარიბაშვილისთვის წერილი არასდროს გაუგზავნია და უარყოფს, რომ წერილი მის პოლიტიკიდან წასვლას უკავშირდება.

"არავითარ კავშირში არ არის. წერილი ღარიბაშვილისთვის კი არა, არავისთვის გამიგზავნია, მესიჯს თუ არ ჩავთვლით. საერთოდ, ცხოვრებაში არავისთვის არანაირი წერილი არ გამიგზავნია, არანაირი, არასდროს.

"წერილი გამოგზავნაო ხომ თქვა? რა შევუთვალე? წერილში რა ეწერა, იცით თქვენ? წაკითხული გაქვთ ეს წერილი? მივყვეთ ლოგიკას. ახლა თავისუფლად საუბრის საშუალება მაქვს. მისი მხარდამჭერის პოზიციიდან არის წერილი დაწერილი, მამუკა მდინარაძის რანაირად შეიძლება რომ ყოფილიყო? სად არის ლოგიკა, აბა მითხარით. "ჩვენ ორი გზა გვაქვს" და რაღაცები ეწერა, ან "უნდა ვიბრძოლოთ ბოლომდე" — მამუკა მდინარაძე წერდა ვიბრძოლოთ ბოლომდეო? თქვენ სერიოზულად უყურებთ ამ საკითხს? არავისთვის არასდროს გამიგზავნია წერილი. პირდაპირ გეუბნებით, მსგავსი საკითხებით მე არასდროს ვყოფილვარ დაკავებული", — განუცხადა მდინარაძემ ჟურნალისტებს (IPN).

ცნობისათვის, სწორედ მამუკა მდინარაძე დაასახელა ექსპრემიერმა ირაკლი ღარიბაშვილმა წერილის შემომგზავნად, რომელიც მან 17 აგვისტოს სოციალურ ქსელში გაასაჯაროვა.

აღნიშნულ წერილში ღარიბაშვილს სთავაზობდნენ, რომ ერთ-ერთ კორუფციულ საქმეზე ბრალი ეღიარებინა, საპროცესო შეთანხმებაზე წასულიყო და 5-წლიანი პატიმრობა მიეღო.

სანაცვლოდ, წერილის მიხედვით, პატიმრობიდან გათავისუფლების შემდეგ პოლიტიკაში აღარ უნდა დაბრუნებულიყო. აღიარებული კორუფციული ბრალდება კი მის წინააღმდეგ ერთგვარ "დაზღვევად" უნდა დარჩენილიყო.

შეგახსენებთ, რომ მთავრობის ადმინისტრაციაში გამართულ ბრიფინგზე მამუკა მდინარაძემ განაცხადა, რომ თანამდებობა დატოვა და პოლიტიკიდან მიდის.