საქართველოს საფეხბურთო ნაკრების ვიცე-კაპიტანმა და კლუბ ვიტესის კაპიტანმა გურამ კაშიამ, რუსთავი 2-სთვის მიცემულ ინტერვიუში თქვა, რომ მსგავსი სამკლაური ყველას ეკეთა.

"აბსოლუტურად ყველას ეკეთა და ვერც ხვდებიან, რომ ამხელა ამბავი მოყვა საქართველოში. ვერც ვუხსნი. აზრადაც არ მომსვლია, რომ ეგ სამკლაური ჩემი ინიციატივით გამეკეთებინა. არა, მართლა არ ყოფილა ეგეთი რამე. ბევრი ლაპარაკი გამოიწვია, რაც მე არ მსიამოვნებს", - ამბობს კაშია.

კაშიას განმარტებით, ეს იყო ჩვეულებრივი თამაში, სადაც ვიტესის კაპიტანს უნდა კეთებოდა სამკლაური:

"გასახდელში შევედი და ის სამკლაური იქ იდო. თვითონ ეს ჰოლანდიელი ხალხი არავინ ელოდა ამხელა გამოხმაურებას საქართველოში. მე კაპიტანი ვარ, რა თქმა უნდა, პასუხისმგებელი ვარ გუნდის რომ გამოვიდეს".

ფეისბუკზე გურამ კაშიას ფოტოს გამოჩენას, რომელზეც თამაშის დროს, ლგბტ დროშის ფერებში სამკლაური უკეთია ქართველი მომხმარებლების ნაწილი გაღიზიანება მოჰყვა. მოგვიანებით კაშიამ განაცხადა, რომ ძალადობის წინააღმდეგია და არ ნანობს რაც გააკეთა. თავად სამკლაური კი ცნობიერების ამაღლების კამპანიის ნაწილია.

გურამ კაშიას ღიად დაუჭირა მხარი ფეხბურთის ფედერაციის პრეზიდენტმა, ლევან კობიაშვილმა და საქართველოს პრეზიდენტმა გიორგი მარგველაშვილმა. სპორტის სხვა წარმომადგენლებმაც გამოუცხადეს თანადგომა კაშიას:

გურამ კაშიას მიერ სამკლაური გაკეთების გამო ქართულმა მარშმა ჰომოფობიურ ნიადაგზე ფეხბურთის ფედერაციასთან საპროტესტო აქცია გამართა. ისინი კობიაშვილისგან ბოდიში მოხდას და კაშიას ნაკრებიდან გარიცხვას ითხოვდნენ. აქციის მონაწილეებმა ლგბტ დროშა დაწვეს და დახიეს.

იმის გამო, რომ სათაური არასწორი ინტერპრეტაციის საშუალებას იძლეოდა, მასალის გამოქვეყნებიდან რამდენიმე წუთში შეიცვალა.