პროსამთავრობო მედიები და მათთან დაკავშირებული სოციალური გვერდები ავრცელებენ ინფორმაციას, თითქოს ვაკეში ოთხი პირის დაჭრაში ბრალდებული პირი პარტია ლელო — ძლიერი საქართველოს აქტივისტი და პარტიის წევრის, გიორგი სიორიძის ახლობელია.

სამთავრობო პროპაგანდისტული ტელეკომპანია "იმედის" განცხადებით, პარტია ლელო — ძლიერი საქართველოს ერთ-ერთი წევრი, გიორგი სიორიძე მკვლელობაში ბრალდებულის მეჯვარეა.

"ტვ პირველთან" საუბრისას გიორგი სიორიძე არ უარყოფს, რომ ბრალდებულს იცნობდა, თუმცა ამბობს, რომ მკვლელს პარტიასთან შეხება არ ჰქონია.

"ჩემთვის ორმაგად მძიმეა ამაზე საუბარი, რადგან არც გარდაცვლილი ბავშვი და არც მკვლელი ჩემთვის უცხო ადამიანები არ არიან. ეს არის მოცემულობა და ამის ბინძურად გამოყენებას ცდილობენ ეს ნაძირლები. მე არ მიყვარს ასეთი სიტყვების გამოყენება, მაგრამ სხვას ვერაფერს ვუწოდებ ამ ადამიანებს- პროპაგანდისტებს, რომლებსაც დილიდან ამოქმედებული და მობილიზებული აქვთ ტროლ-ბოტების ქარხანა, რათა ტრაგედიით პოლიტიკური ქულები დაიწერონ და როგორმე გაანეიტრალონ ის პასუხისმგებლობა, რომელიც „ქართულ ოცნებას“ ეკისრება ქვეყანაში ასეთი გარემოს შექმნის გამო.

17 წლის ბავშვია გარდაცვლილი, სხვები დაჭრილები არიან (ღმერთმა ჯანმრთელად ამყოფოს თითოეული მათგანი) და ამ ტრაგედიით ცდილობენ პოლიტიკურ კაპიტალიზებას. თან ბინძურად იტყუებიან და ავრცელებენ ინფორმაციას, თითქოს მკვლელი ჩვენი პარტიის, ძლიერი საქართველო-ლელოს წევრი და აქტივისტი იყო, მაშინ როდესაც მას ლელოსთან არანაირი შეხება არ ჰქონია.

როდესაც ლელო დაფუძნდა, მას უკვე ჰქონდა ფსიქიკური ჯანმრთელობის პრობლემები და წლებია, პრაქტიკულად, სოციალური ცხოვრებიდან იზოლირებულია. მას არანაირი," — განაცხადა სიორიძემ.

მისივე შეფასებით, "ეს ყველაფერი ხდება იმისთვის, რომ ყურადღება გადაიტანონ სახელმწიფოს პასუხისმგებლობიდან, იმ ფაქტიდან, რომ ქვეყანაში მოშლილია პრევენციის ღონისძიებები, ხოლო ფსიქიკური ჯანმრთელობის საკითხი სტიგმატიზებულია. ადამიანებს ხშირად არც შესაძლებლობა აქვთ და არც უსაფრთხო გარემო, რომ შესაბამის დაწესებულებებს მიმართონ, რადგან ამ თემაზე საუბარი კვლავ სირცხვილად მიიჩნევა".

"ის ბავშვი მხოლოდ მკვლელის ტყვიამ არ იმსხვერპლა. ის სახელმწიფოს გულგრილობამ და სისტემურმა უმოქმედობამ იმსხვერპლა. ეს არის მთელი ჩვენი საზოგადოების ტრაგედია. აი ამაზე უნდა ვისაუბროთ ახლა, თუმცა ამის ნაცვლად, ქართულ ოცნებაში ვიწრო პოლიტიკანურ ინტრიგებს ხლართავდნენ და ტრაგედიის ფონზე პოლიტიკური ქულების დაწერას ცდილობდნენ.

...ეს სისტემა თუ არ დაინგრა, "ქართული ოცნების" რეჟიმი თუ არ შეიცვალა, რომლისთვისაც ყველაფერი ერთი კაცის კომფორტის, ფუფუნების და ხელშეუხებლობის ინტერესებიდან გამომდინარე იმართება, ქვეყანა ისევ გააგრძელებს ცხოვრებას ტრაგედიიდან ტრაგედიამდე", — განაცხადა სიორიძემ.

ხორავას ქუჩაზე მომხდარი სროლის შედეგად დაშავებული ერთ-ერთი არასრულწლოვანი კლინიკაში გარდაიცვალა. უწყების ინფორმაციით, განზრახ მკვლელობის მცდელობის ბრალდებით, ერთი პირი ცხელ კვალზე დააკავეს. პირმა ცეცხლსასროლი იარაღიდან გასროლით 4 პირი დაჭრა, მათ შორის ორი არასრულწლოვანი.