ვაკეში მომხდარი მკვლელობის საქმეზე ბრალდებულის დედის, დოდო ოდიშარიას განცხადებით, მის შვილს ფსიქიკური პრობლემები აქვს. ის "ტვ პირველთან" საუბრისას იხსენებს, რომ წარსულში შვილმა მის მიმართაც გამოავლინა აგრესია, რის გამოც შემაკავებელი ორდერიც ჰქონდა გამოწერილი.

ბრალდებულის დედის განმარტებით, შვილს იარაღი ფსიქიკური პრობლემების დაწყებამდე ჰქონდა გაფორმებული. მას შემდეგ, რაც აგრესია გამოავლინა, მან პოლიციას სთხოვა, იარაღი ჩამოერთვათ, ჩამოართვეს, თუმცა მოგვიანებით უკან დაუბრუნეს.

"იარაღი გაფორმებული ჰქონდა. სანამ ფსიქიატრიული პრობლემები დაეწყებოდა, მანამდე გაიფორმა. ეს მე პოლიციასაც ვუთხარი. იყო ისეთი შემთხვევაც, როცა ჩემ მიმართაც დაიწყო აგრესია... ერთთვიანი შემაკავებელი ორდერი დაუწერეს. კი არ შემხებია, სკამებს ამტვრევდა. მაშინ ვუთხარი პოლიციას, კარგად ვერ არის და წაიღეთ ეს იარაღები-მეთქი. წაიღეს, თუმცა უკან დაუბრუნეს. ზუსტად ვერ გეტყვით, ეს 4-5 წლის წინ მოხდა. საერთოდ, სამი იარაღი აქვს გაფორმებული, თუმცა ახლა ხმარებაში მხოლოდ ერთი ჰქონდა," — განაცხადა დოდო ოდიშარიამ "ტვ პირველთან" საუბრისას.

ქალი შვილის დაკავების დეტალებიც გაიხსენა. მკვლელობაში ბრალდებული კაცი სახლში იარაღით ჩაიკეტა და პოლიციას შიგნით არ უშვებდა.

"იარაღით იყო სახლში. პოლიციას არ უშვებდა. მე საერთოდ გამომიყვანეს. საშინელი ხმა იყო. იარაღის ხმა არ იყო. სპეცრაზმელები იყვნენ. ვუთხარი მათ, კარებთან არ მისულიყვნენ და მე მივეშვით. ერთი მკვდარი ხომ არის, მეორე არ მინდა-თქო. არ გამაჩერეს, არაო.

მე ვუთხარი არ იხმაუროთ-თქო. ეგ იყო სულ და მერე გაგრძელდა იქით. ის ბავშვი არ მომკვდარიყო. დედისთვის ძალიან ძნელია ამის თქმა, მაგრამ ეს მომკვდარიყო და ის ცოცხალი ყოფილიყო," — განაცხადა დოდო ოდიშარიამ.

დედის განმარტებით, ის შვილს მკურნალობდა, თუმცა ფსიქიატრიულ დაწესებულებაში არ გააჩერეს.

"იწვა კლინიკაში თემქაზე. ისე გავაჩერე აბა? წამალში გერმანიიდან ჩამოჰქონდათ, აქაური წამალი მაგისთვის არ მიმიცია. 800 ევროს ვიხდიდი. ვერ წარმოვიდგენდი, რომ ის კაცს მოკლავდა," — აცხადებს დოდო ოდიშარია.

ხორავას ქუჩაზე მომხდარი სროლის შედეგად დაშავებული ერთ-ერთი არასრულწლოვანი კლინიკაში გარდაიცვალა. უწყების ინფორმაციით, განზრახ მკვლელობის მცდელობის ბრალდებით, ერთი პირი ცხელ კვალზე დააკავეს. პირმა ცეცხლსასროლი იარაღიდან გასროლით 4 პირი დაჭრა, მათ შორის ორი არასრულწლოვანი.