22 ივლისის ღამეს ვერაზე მომხდარი სროლის შედეგად 4 ადამიანი დაიჭრა, ერთი მათგანი კლინიკაში შეყვანის შემდეგ გარდაიცვალა, 2 კი კლინიკა "ჰელსიკორეში" აგრძელებს მკურნალობას.

• ვერაზე მომხდარი სროლის შედეგად დაშავებული ერთ-ერთი არასრულწლოვანი კლინიკაში გარდაიცვალა

როგორც საზოგადოებრივ მაუწყებელთან საუბრისას კლინიკის აღმასრულებელი დირექტორი შმაგი ჭიოკაძე ამბობს, 17-18 წლის პაციენტები მათ კლინიკაში 22 ივლისს, დაახლოებით 22:00 საათზე შეიყვანეს. ერთს დაზიანება ჰქონდა მარცხენა მხრის არეში, მეორეს — მარცხენა ბარძაყის არეში. ორივეს ჩაუტარდა ოპერაციული მკურნალობა, წარმატებით ჩაიარა ოპერაციამ. მათ სიცოცხლეს საფრთხე არ ემუქრება.

"22 ივლისს, დაახლოებით 22 საათზე, საღამოს შემოყვანილ იქნა ჩვენს კლინიკაში ორი ახალგაზრდა ბიჭი, 17-18 წლისანი.

ორივეს ესაჭიროებოდა ოპერაციული მკურნალობა: ერთს დაზიანება ჰქონდა მარცხენა მხრის არეში, მეორეს — მარცხენა ბარძაყის არეში. ორივეს ჩაუტარდა ოპერაციული მკურნალობა, წარმატებით ჩაიარა ოპერაციამ.

ამ დროისთვის, დღევანდელი მდგომარეობით, ორივენი არიან სტაბილურად, მათ სიცოცხლეს და ჯანმრთელობას საფრთხე არ ემუქრება.

კონტაქტური არიან, ჩვეულებრივად ვესაუბრე ახლა, 5 წუთის წინ დაახლოებით. ორივენი კარგად არიან, თავს კარგად გრძნობენ, მათ სიცოცხლეს და ჯანმრთელობას საფრთხე არ ემუქრება", — განაცხადა შმაგი ჭიოკაძემ.

შსს-ს ცნობით, განზრახ მკვლელობის მცდელობის ბრალდებით, ერთი პირი ცხელ კვალზე დააკავეს. მან ცეცხლსასროლი იარაღიდან გასროლით 4 პირი დაჭრა, მათ შორის ორი არასრულწლოვანი.

განცხადებაში ვკითხულობთ, რომ ბრალდებული ადგილიდან მიიმალა და დაკავებისას სამართალდამცველებს შეიარაღებული წინააღმდეგობა გაუწია.

"შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ორი ან მეტი პირის მიმართ დამამძიმებელ გარემოებებში ჩადენილი განზრახ მკვლელობის მცდელობის ბრალდებით, ერთი პირი ცხელ კვალზე დააკავეს.
გამოძიებით დადგინდა, რომ ბრალდებულმა მიმდინარე წლის 22 ივლისს, თბილისში, ცეცხლსასროლი იარაღიდან გასროლით ოთხი პირი დაჭრა და შემთხვევის ადგილიდან მიიმალა. დაჭრილებს შორის 2 არასრულწლოვანია.

ოთხივე მათგანი სამედიცინო დახმარების გაწევის მიზნით კლინიკაში გადაიყვანეს, თუმცა მიყენებული დაზიანების შედეგად, ერთ-ერთი არასრულწლოვანი საავადმყოფოში მიყვანიდან მალევე გარდაიცვალა.

სამართალდამცველებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულის ჩამდენი პირი მომხდარიდან მალევე დააკავეს.

ბრალდებულმა დაკავებისას სამართალდამცველებს შეიარაღებული წინააღმდეგობა გაუწია. დაკავებისას ბრალდებულმა ხელის თითებზე დაზიანება მიიღო," — წერს უწყება.

გამოძიება საქართველოს სისხლის სამართლის კოდექსის 19-109-ე მუხლით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

• თბილისში, ვერაზე სროლა იყო, არიან დაჭრილები

უწყება არ აკონკრეტებს, რა იყო თავდასხმის მიზეზი. თვითმხილველი ელენე ქორიძე სოციალურ ქსელში წერს, რომ ბრალდებულმა მანქანაში მჯდომ 17-18 წლის სამ ბიჭს ცეცხლი გაუხსნა "უბრალოდ იმის გამო, რომ იცინოდნენ".

"დაახლოებით ერთი საათის წინ, ზუსტად ჩემი სახლის წინ, კაცმა მანქანაში მჯდომ 17-18 წლის სამ ბიჭს ცეცხლი გაუხსნა უბრალოდ იმის გამო, რომ იცინოდნენ. ამის შემდეგ, შორიახლოს მყოფ ქალსაც ესროლა. ის მალევე დაიჭირეს.

ზედაპირული შეფასებითაც ცხადია, რომ ეს არ ყოფილა წინასწარ დაგეგმილი თავდასხმა ან პირადი ანგარიშსწორება. არც ცალკე აღებული მძიმე კრიმინალური შემთხვევა მხოლოდ, რომელზეც სწრაფად ირეაგირა პოლიციამ, არამედ იმ რეალობის პირდაპირი ანარეკლი, რომელშიც ვცხოვრობთ.

როდესაც ქვეყანაში კონსოლიდირებული ავტორიტარიზმია დამყარებული, სახელმწიფო ინსტიტუტები შინაარსისგან იცლება და ორიენტირებული ხდება მხოლოდ საკუთარი ძალაუფლების შენარჩუნებაზე, სწორედ მაშინ ყველაფერი კარგავს თავის რეალურ მნიშვნელობასა და ღირებულებას, კანონიც, უსაფრთხოებაც და რაც ყველაზე ტრაგიკულია, ადამიანის სიცოცხლეც," — წერს ქორიძე.