22 ივლისის ღამეს ვერაზე მომხდარ სროლაში ბრალდებული პირი ალექსანდრე ალადაშვილის სახელობის კლინიკაშია გადაყვანილი.

კლინიკის წარმომადგენელმა ჟურნალისტებთან განაცხადა, რომ ბრალდებული მარცხენა ხელის თითის ამპუტირებით შემოიყვანეს.

"სასწრაფო დახმარების მიერ შემოყვანილი იქნა 42 წლის კაცი. დაზიანება იყო მარცხენა მტევნის პირველი თითის არეში, ამპუტირებული იყო თითი, მარჯვენა მტევნის არეშიც იყო დაზიანება, თუმცა იქ ზედაპირული ტრავმები იყო პაციენტთან. ჩატარდა შესაბამისი კლინიკო-ლაბორატორიული კვლევები. პაციენტი გადაუდებელი დახმარების განყოფილებიდან ავიდა საოპერაციო ბლოკში. ამ წუთას ქირურგიულ განყოფილებაში იმყოფება," — განაცხადა ექიმმა.

შინაგან საქმეთა სამინისტროს ინფორმაციით, ბრალდებული თავდასხმის ადგილიდან მიიმალა და დაკავებისას სამართალდამცველებს შეიარაღებული წინააღმდეგობა გაუწია.

ხორავას ქუჩაზე მომხდარი სროლის შედეგად დაშავებული ერთ-ერთი არასრულწლოვანი კლინიკაში გარდაიცვალა. უწყების ინფორმაციით, განზრახ მკვლელობის მცდელობის ბრალდებით, ერთი პირი ცხელ კვალზე დააკავეს. პირმა ცეცხლსასროლი იარაღიდან გასროლით 4 პირი დაჭრა, მათ შორის ორი არასრულწლოვანი.