ეროვნული სატყეო სააგენტოს განცხადებით, ბორჯომის ხეობაში ტყეკაფების გამოყოფა სოციალური ჭრისთვის ხორციელდება, რომელიც მათივე განმარტებით, საქართველოს მოსახლეობის სათბობ რესურსზე მოთხოვნილების დაკმაყოფილების საშუალებას წარმოადგენს.

სააგენტო განმარტავს, რომ ხე-ტყის დამზადება მიმდინარეობს ტყის ინვენტარიზაციის საფუძველზე მომზადებული ტყის მართვის გეგმებით დაშვებული მოცულობების ფარგლებში.

სატყეო სააგენტო აცხადებს, რომ ბორჯომის ხეობაში მიმდინარეობს სანიტარული ჭრებიც:

"ტყის მავნე მწერმა მბეჭდავმა ქერქიჭამიამ დიდი ზიანი მიაყენა სამცხე-ჯავახეთში წიწვოვან ტყის მასივებს. 2012 წლიდან ხორციელდება მავნებელთან ბრძოლის ღონისძიებები ფერომონიანი მწერსაჭერების გამოყენებით, თუმცა, საუკეთესო შედეგების მიღების უზრუნველსაყოფად აუცილებელია სანიტარული ჭრების განხორციელებაც, რომელიც არა მხოლოდ საქართველოს პირობებისთვის, არამედ, ზოგადად, მსოფლიო მასშტაბით მეტყევეობაში მიღებული პრაქტიკაა".

სააგენტოს განცხადებით, აღნიშნული ღონისძიება უზრუნველყოფს ტყეების ხარისხობრივი მაჩვენებლების გაუმჯობესებას.

სააგენტოს მონაცემებით, მიმდინარე წელს, ოქტომბრში ეროვნული სატყეო სააგენტოს თანამშრომლებმა უკანონოდ ხე-ტყის მოპოვების სამართალდარღვევის 337 ფაქტი გამოავლინეს. მათ შორის, 21 ფაქტი დაფიქსირდა მიმდინარე წლის აგვისტოს პერიოდში ბორჯომის ხეობაში ხანძრის დროს.

გარემოსდაცვითი ზედამხედველობის დეპარტამენტის მონაცემებით, 2017 წლის პირველი იანვრიდან დღემდე, უკანონო ტყითსარგებლობისა და ხე-ტყის ტრანსპორტირების წესების დარღვევის 2 250 ფაქტი გამოავლინეს.

აგვისტოს თვის სტატისტიკური მონაცემებით, გარემოსდაცვითი ზედამხედველობის დეპარტამენტის თანამშრომლებმა, ამ პერიოდში, უკანონო ტყითსარგებლობისა და ხე-ტყის ტრანსპორტირების წესების დარღვევის 208 ფაქტი გამოავლინეს. აქედან, 198 - ადმინისტრაციული სამართალდარღვევის და 10 - სისხლის სამართლის დანაშაულის ნიშნების შემცველი. მხოლოდ აგვისტოს თვეში, დეპარტამენტის თანამშრომლებმა უკანონოდ მოქმედი, მრგვალი ხე-ტყის გადამამუშავებელი 20 საახერხი დანადგარი ამოიღეს.

თი ბი სი ბანკის ერთ-ერთმა აქციონერმა, მამუკა ხაზარაძემ დღეს, 30 ოქტომბერს ფეისბუქის საკუთარ გვერდზე დაწერა, რომ ბაკურიანის გზაზე, ტყიდან ხის ახლად მოჭრილი მორებით დატვირთული მანქანა შენიშნა.

როგორც თავად ჰყვება, სატყეოს მუშებმა მას განუცხადეს, რომ სოციალური საჭიროებისათვისა და სანიტარული მიზეზით მოჭრეს ხეები:

"ეს ხდება იქ, სადაც სულ რაღაც ორი თვის წინ ხანძრის გამო ასეულობით ჰექტარი ტყე განადგურდა. ისიც უნდა ითქვას, რომ იმ დროსაც კი, როდესაც მეხანძრეები ცეცხლს ებრძოდნენ, ბორჯომის ხეობაში ხის ჭრა არ გაჩერებულა!!! პირდაპირ მინდა განვაცხადო: თუ ასე გაგრძელდა და თუ ამის აღსაკვეთად სასწრაფოდ რადიკალური ზომები არ იქნა მიღებული, არა მარტო ტყეს, არამედ ბორჯომის კურორტს და მინერალურ წყალსაც დავკარგავთ, რამეთუ სწორედ ბორჯომის ტყეა ის ძირითადი რესურსი და სიმდიდრე, რომელიც ბორჯომის უნიკალურ მინერალურ წყალს ქმნის".

ბორჯომის ხეობაში ცეცხლი 20 აგვისტოს გაჩნდა. სახანძრო-სამაშველო ოპერაციაში ჩაერთო აზერბაიჯანული და თურქული ტექნიკა, ასევე ხანძრის ლოკალიზებაში მონაწილეობა სომხეთმა და ბელორუსიამ მიიღეს.