საქართველოს სპორტული ჟურნალისტები ფეხბურთელ გურამ კაშიას მხარდასაჭერ განცხადებას ავრცელებენ. სპორტული ჟურნალისტი ქეთი ბაჭველაშვილი ფეისბუკზე წერს, რომ საზოგადოების გარკვეული ნაწილის მოთხოვნა, გურამ კაშიას ეროვნული ნაკრებიდან მოკვეთა, "დაუშვებელი და არაადეკვატურია".

"ვფიქრობთ, ფეხბურთს აქვს ის არაჩვეულებრივი უნარი და ძალა, რომ საზოგადოება ძალადობის წინააღმდეგ გააერთიანოს. სასიამოვნოა, რომ ჩვენი საფეხბურთო ეროვნული ნაკრების ფეხბურთელები გმობენ ძალადობას მოედანზეც და ცხოვრებაშიც. სწორედ, ამის დასტურია გურამ კაშიას საქციელი", - ნათქვამია პოსტში.

ჟურნალისტების თქმით, გურამ კაშიას საქციელი საზოგადოებამ არაერთგვაროვნად არაინფორმირებულობის გამო აღიქვა.

"ამიტომ, სპორტული ჟურნალისტები გურამ კაშიას სრულ მხარდაჭერას ვუცხადებთ და საჯაროდ ვაფიქსირებთ, რომ ყოველგვარი ძალადობის წინააღმდეგი ვართ.
გურამ კაშია იყო, არის და იქნება საქართველოს ნაკრების ერთ-ერთი ყველაზე გამორჩეული ფეხბურთელი და ის კიდევ არაერთხელ მოირგებს ეროვნული გუნდის მაისურს".

მათივე თქმით, მცდელობის მიუხედავად ვერ მოხერხდა სპორტულ ჟურნალისტთა ასოციაციის სახელით ერთიანი განცხადების გაკეთებას, ამიტომ ამ განცხადებას ხელს სპორტულ ჟურნალისტთა ერთი ჯგუფი აწერს.

გურამ კაშია საქართველოს ეროვნული ნაკრების ფეხბურთელი და ნიდერლანდების გუნდ ვიტესის კაპიტანია. ფეისბუკზე მისი ფოტოს გამოჩენას, რომელზეც თამაშის დროს, ლგბტ დროშის ფერებში სამკლაური უკეთია ქართველი მომხმარებლების ნაწილი გააღიზიანა. მოგვიანებით კაშიამ განაცხადა, რომ ძალადობის წინააღმდეგია და არ ნანობს რაც გააკეთა. თავად სამკლაური კი ცნობიერების ამაღლების კამპანიის ნაწილია.

კაშიას სჯაროდ მხარი დაუჭირა ფეხბურთის ფედერაციის პრეზიდეტნმა ლევან კობიაშვილმა და სპორტის სხვა წარმომადგენლებმაც.