ფინანსთა მინისტრის მოადგილის, გიორგი კაკაურიძის თქმით, "არ იცის რატომ ელოდებოდა საზოგადოება პროდუქტებზე ფასების დაწევას". მისი თქმით, "გარკვეული ნაბიჯები იქნება გადადგმული, თუმცა ერთ თვეში ეს ნამდვილად ვერ მოხდებოდა".

"[პროდუქტების] გაიაფებას რატომ ველოდებოდით, არ ვიცი. ამ საკითხზე მუშაობდა კომისია და გარკვეული ნაბიჯები იქნება გადადგმული, თუმცა ერთ თვეში ეს ნამდვილად ვერ მოხდებოდა. გარკვეული მიმართულებებით მუშაობს, როგორც მთავრობაში შექმნილი სამუშაო ჯგუფი, ასევე ამასთან დაკავშირებით პარლამენტის დასკვნა გვაქვს. თუმცა ის, რომ გარკვეულ პროდუქტებზე არის ფასების ზრდა, ეს მათ შორის ტრანსპორტირების ხარჯების ნაწილით არის გამოწვეული, რაც ვიცით გარკვეული მიზეზებია ამისი, მათ შორის საწვავის გაძვირების მიმართულებით," — განაცხადა ფინანსთა მინისტრის მოადგილემ, გიორგი კაკაურიძემ "ტვ პირველთან" საუბრისას.

საქსტატის ინფორმაციით, 2026 წლის მაისში წინა თვესთან შედარებით ინფლაციის დონემ საქართველოში 0.3% ხოლო წლიური ინფლაციის დონემ 5.7% შეადგინა.

წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: სურსათი და უალკოჰოლო სასმელები: ჯგუფში ფასები გაიზარდა 5.2%-ით, რაც წლიურ ინფლაციაზე 1.84%-ით აისახა.

ფასები მომატებულია ქვეჯგუფებზე:

თევზეული (20.9%), ხორცი და ხორცის პროდუქტები (10.1%), პური და პურპროდუქტები (7.0%), ხილი და ყურძენი (6.5%), ზეთი და ცხიმი (6.1%), შაქარი, ჯემი და სხვა ტკბილეული (6.0%), ყავა, ჩაი და კაკაო (5.4%), რძე, ყველი და კვერცხი (4.1%), მინერალური და წყაროს წყალი, უალკოჰოლო სასმელები და ნატურალური წვენები (1.5%).

ტრანსპორტის ჯგუფში ფასები გაიზარდა 15.1%-ით, რაც წლიურ ინფლაციაზე 1.72 პროცენტული პუნქტით აისახა.

ფასები მომატებულია პირადი სატრანსპორტო საშუალებების ექსპლუატაციაზე (22.7%) და სატრანსპორტო მომსახურებაზე (9.3%);

საცხოვრებელი, წყალი, ელექტროენერგია, აირი: ჯგუფში ფასები მომატებულია 7.0%-ით, რაც 0.66%-ით აისახა მთლიან ინდექსზე.