ბოდბის მონასტერში ექსკურსიის დროს 12 წლის გოგო დაშავდა. ინფორმაციას ადგილობრივი მედია ავრცელებს. მათი ცნობით, მეექვსეკლასელი, რომელიც წარმოშობით ბოლნისიდან არის, შემთხვევის დროს პედაგოგებსა და მშობლებთან ერთად, მონასტრის დასათვალიერებლად იმყოფებოდა.

თვითმხილველების ინფორმაციით, გოგონა, შემოღობილ ადგილზე რამდენიმე მეტრის სიმაღლიდან გადავარდა და თავი სავარაუდოდ ქვას დაარტყა.

მიღებული ტრავმით ის სასწრაფო-სამედიცინო დახმარების ბრიგადამ წნორში, "არქიმედეს" კლინიკაში გადაიყვანა.

"მთავარი ამბები კახეთიდან იტყობინება", რომ კლინიკის მენეჯერის, ოთარ რუაძის განცხადებით, მოზარდს აქვს მსუბუქი დაზიანება, აღენიშნება თავის ტვინის შერყევა და შესაბამისი მკურნალობა უტარდება.