საქართველოში მცხოვრები ერთიკურად აზერბაიჯანელი, ბოლნისის მუნიციპალიტეტის სოფელ დარბაზის მკვიდრი, ნაშირ ორდუხანოვი სოციალურ ქსელში საქართველოს კათოლიკოს-პატრიარქსი, შიო III-ის განცხადებას ეხმაურება, რომელიც საქართველოში დემოგრაფიულ საკითხებს ეხებოდა.

ორდუხანოვის კომენტარს "რადიო მარნეული" ავრცელებს. მისი განმარტებით, საქართველოს პატრიარქისგან "სხვა ერების გამრავლებასთან" დაკავშირებული განცხადების მოსმენა არ იყო სასიამოვნო, "წინა პატრიარქის ბატონ ილია ll-ის დროს მსგავსი განცხადებებს არ გვესმოდა".

ორდუხანოვი ასევე აღნიშნავს, რომ ქვეყანაში უსინდისო ადამიანების, პედოფილების, რასისტების, ფაშისტების, თაღლითების, კრიმინალების... გამრავლებაა პრობლემა და არა "სხვა ერების გამრავლება."

"მინდა გამოვეხმაურო საქართველოს ახალარჩეული პატრიარქის განცხადებას რომელიც უკავშირდება საქართველოში "სხვა ერების გამრავლებას". მინდა ავღნიშნო, რომ მეც ვარ ე.წ "სხვა ერის წარმომადგენელი" და საქართველოს პატრიარქისგან მსგავსი განცხადების მოსმენა არ იყო სასიამოვნო.

ჩვენ წინა პატრიარქის ბატონ ილია ll-ის დროს მსგავსი განცხადებებს არ გვესმოდა, პირიქით მან ყოველთვის თანასწორობაზე და სხვა ერებისადმი პატივისცემაზე უსვამდა ხაზს.
მე ვფიქრობ რომ საქართველოში მთავარი პრობლემას წარმოადგენს არა "სხვა ერების გამრავლება" არამედ ქვეყანაში უსინდისო ადამიანების, პედოფილების, რასისტების, ფაშისტების, თაღლითების, კრიმინალების და ა.შ. გამრავლებამ. შესაბამისად ჩვენ როგორც პატრიარქი, იმამები, საზოგადოება, ხელისუფლება, მრევლი და ხალხი ყველამ ერთად ხელი შევუწყოთ და ყველაფერი გავაკეთოთ რომ ამ ქვეყანაში გამრავლდეს არა "კონკრეტული ერის წარმომადგენლები" არამედ "კეთილსინდისიერი ადამიანების" რაოდენობა", — წერს სოციალურ ქსელში ნაშიხ ორდუხანოვი.

შეგახსენებთ, საქართველოს კათალიკოს-პატრიარქმა, შიო III-მ საქართველოში დემოგრაფიულ მდგომარეობაზე საუბრისას აღნიშნა, რომ "რეალურია იმის საშიშროება, რომ ქვეყანაში სხვა ხალხები დამკვიდრდებიან და რიცხობრივად ქართველებს გადააჭარბებენ".

"თუ არ გამოვასწორეთ ჩვენი დემოგრაფიული მდგომარეობა, თუ არ ვიზრუნეთ ოჯახის განმტკიცებაზე, გადარჩენაზე, შენარჩუნებაზე, ჩვენ გვემუქრება რეალური საშიშროება, რომ ჩვენ მშვენიერ სამოთხესავით ლამაზ და მშვენიერ ქვეყანაში დამკვიდრდებიან სხვა ხალხები, ჩვენთან ერთად, რომლებსაც უყვართ ბავშვები, რომლებიც არ იშორებენ შვილებს, რომლებიც იცავენ თავიანთ რელიგიას და ამიტომ კარგად მრავლდებიან. შეიძლება, ღმერთმა დაგვიფაროს, რა თქმა უნდა, მაგრამ ასე თუ გავაგრძელეთ ჩვენ, ეს საშიშროება რეალურია, რომ გადააჭარბონ რიცხობრივად ქართველობას. მადლი მოგცეს უფალმა, რომ ვიშრომოთ, ვიღვაწოთ ოჯახის გადარჩენისთვის, ოჯახური ღირებულებების დაცვისთვის, რომ ვიქონიოთ ისეთი კანონმდებლობა, რომელიც დაიცავს ოჯახს, ჩვენს ხალხს მავნე გენდერული თეორიებისგან, იდეოლოგიისგან. უარი კი არ უნდა ვთქვათ ამ კანონმდებლობაზე, როგორც ზოგიერთები მოგვიწოდებენ, არამედ პირიქით, უნდა გავაძლიეროთ და განვამტკიცოთ ეს მიმართულება, ოჯახის დაცვის და შენარჩუნების. ეს არის ჩვენი ქვეყნის გადარჩენის, გამრავლების საწინდარი, ასევე ღვთის წყალობის", — აღნიშნა შიო III-მ.