ჟურნალისტებმა ირაკლი კობახიძეს დიუშენით დაავადებული ბავშვების მშობლების პროტესტზე ჰკითხეს. კობახიძის თქმით, ამ თემით ჯანდაცვის სამინისტროა დაკავებული და "გონივრული გადაწყვეტილება" უნდა მიიღონ.

კობახიძის განმარტებით, "მილიარდიც კი არავის დაენანება, თუ კონკრეტული გადაწყვეტილება იქნება კონკრეტულ შედეგზე გათვლილი".

"ჯანდაცვის სამინისტრო არის ამ საკითხით დაკავებული, ჯანდაცვის სამინისტროს აქვა ექსპერტული ცოდნა და, რა თქმა უნდა, უნდა გაგრძელდეს ამ რეჟიმში მუშაობა.
რაც მთავარია, გონივრული გადაწყვეტილებები უნდა იყოს მიღებული, ყველა რისკფაქტორი უნდა იყოს გათვალისწინებული, მათ შორის ფარმაცევტული მაფიის ინტერესები — ეს ერთ-ერთი მნიშვნელოვანი ფაქტორია.

ჩვენ მთავარია, რომ გონივრული გადაწყვეტილება მივიღოთ ისე, რომ გონივრულად დაიხარჯოს თითოეული თეთრი სახელმწიფო ბიუჯეტიდან.

კიდევ ერთხელ ვიმეორებ, მილიარდიც კი არავის დაენანება, თუ კონკრეტული გადაწყვეტილება იქნება კონკრეტულ შედეგზე გათვლილი," — განაცხადა კობახიძემ.

კობახიძემ არ უპასუხა ჟურნალისტების კითხვას, შეხვდებოდა თუ არა მშობლებს.

შეგახსენებთ, უკვე მე-17 დღეა დიუშენის დისტროფიით დაავადებული ბავშვების მშობლები კანცელარიასთან ღამეს ათენებენ. მშობლების მოთხოვნაა, მთავრობამ უზრუნველყოს სიცოცხლისთვის აუცილებელი მედიკამენტის ჩამოტანა და მათ ირაკლი კობახიძე შეხვდეს.