საქართველოს მე-5 პრეზიდენტი სალომე ზურაბიშვილი გეგმავს, რომ დიუშენის კუნთოვანი დისტროფიით დაავადებული ბავშვების დახმარების თხოვნით ევროკავშირის ელჩს, ევროკავშირის ჯანდაცვის კომისარს და ამერიკის ელჩის მოვალეობის შემსრულებელს მიმართოს. ამის შესახებ მან საკუთარ ფეისბუქ-გვერდზე განაცხადა. ზურაბიშვილი იმედოვნებს, რომ ეს თხოვნა უპასუხოდ არ დარჩება.

"გადავწყვიტე, მივმართო ევროკავშირის ელჩს და ევროკავშირის ჯანდაცვის კომისარს. დიდი ყურადღებით მოვისმინე მათი განცხადებები, რომ სანამ ეს მთავრობა არ შეცვლის თავის კურსს, არაფერი წინსვლა არ იქნება. სამაგიეროდ, ევროკავშირი მხარს უჭერს ჩვენ საზოგადოებას, რომელიც ჯერ კიდევ იბრძვის და რომელმაც თავისი პროევროპულობა არაერთხელ გამოაჩინა. ალბათ მოიძებნება საჭირო თანხები იმისთვის, რომ დაეხმარონ მშობლებს და მათთვის გამოიყოს თანხები, რომელიც საჭიროა. ზეგ არის 9 მაისი — ევროპის დღე და ევროპის დღეს ჩემი წარმომადგენლები მიიტანენ ევროკავშირის ელჩთან წერილს, რითაც მე მოვითხოვ, რომ დახმარება გამოიყოს დიუშენის კუნთოვანი დისტროფიით დაავადებული ბავშვების მშობლებისთვის. დიდი იმედი მაქვს, რომ არ დარჩება უპასუხოდ იმიტომ, რომ ეს არის საკითხი, რომელიც სიმბოლური იქნება მთელი საზოგადოებისთვის, რომ ევროკავშირი დღესაც, კიდევ არის ჩვენს გვერდით.

ამავე დროს, იგივე წერილით მივმართავ ამერიკის ელჩის მოვალეობის შემსრულებელს, რომ გადაეცეს სახელმწიფო დეპარტამენტს იგივე თხოვნა, რომ ამერიკელებმაც, რომლებიც ასევე ძალიან ბევრი დაავადების წინააღმდეგ ბრძოლაში ჩვენს გვერდით იყვნენ.რეალურად ჩვენ ვერ დავამარცხებდით იმ დაავადებებს რომ არა ამერიკის დახმარება, ამ მომენტში, ამ დროს გამოგვიწოდონ კიდევ დახმარების ხელი", — განაცხადა საქართველოს მე-5 პრეზიდენტმა, სალომე ზურაბიშვილმა სოციალურ ქსელში.

დიუშენის კუნთოვანი დისტროფიით დაავადებული ბავშვების მშობლებმა, პრემიერმინისტრთან შეხვედრის და დაავადების სამკურნალო პრეპარატების შემოტანის მოთხოვნით მე-17 ღამე გაათიეს. მთავრობის წარმომადგენლები დიუშენის სამკურნალო პრეპარატების შემოტანაზე უარს უსაფრთხოების მიზნებით ხსნიან.