პარტია ფედერალისტების ერთ-ერთი ლიდერი, გიგა ბოკერია, სოციალურ ქსელში საქართველოს მართლმადიდებელი ეკლესიის მიერ ახალი პატრიარქის, შიო III-ის არჩევას ეხმაურება. ბოკერია ხაზს უსვამს ქრისტიანული მრწამსის როლს ქართული იდენტობისა და დასავლური ვექტორის ჩამოყალიბებაში და ყურადღებას ამახვილებს იმ გამოწვევებზე, რომელთა წინაშეც ეკლესია დგას.

ბოკერიას შეფასებით, რუსული იმპერიალიზმი და საბჭოთა რეჟიმი ისტორიულად ცდილობდნენ რელიგიური გზავნილების გამოყენებას საქართველოს თავისუფლების წინააღმდეგ, რაც დღესაც მტრის სტრატეგიის ნაწილია.

"დღეს საქართველოს მართლმადიდებელი ეკლესიის გაფართოებულმა კრებამ აირჩია 142-ე სრულიად საქართველოს კათოლიკოს-პატრიარქი, უწმინდესი და უნეტარესი შიო III.

ქრისტიანული მრწამსი იყო ის ფუნდამენტი, რომელმაც შეკრა ქართული ეროვნული იდენტობა და განსაზღვრა ჩვენი კუთვნილება დასავლური, თავისუფალი სამყაროსადმი. არაერთი გარე მტერი წარუმატებლად შეეცადა ტირანული ძალადობით ამ იდენტობის წაშლას. რუსული იმპერიალიზმი "ერთმორწმუნეობის" ყალბი გზავნილის გამოყენებით ცდილობდა იმავეს, საბჭოთა ტოტალიტარული რეჟიმი კი სისხლიანი რეპრესიების პარალელურად, ცინიკურად იყენებდა ფსევდო რელიგიურ გზავნილებს.

ეს იყო და არის საქართველოს მტრის სტრატეგიის ერთ-ერთი ხაზი — რელიგიურ ერთობაზე ფარისევლური აპელირებით და რეალურად სამოქალაქო თავისუფლების საწინააღმდეგო, ანტიქრისტიანული პროპაგანდით წაშალოს ჩვენი იდენტობა და შეაჩეროს თავისუფლებისკენ საქართველოს სწრაფვა.

ახალი პატრიარქის მემკვიდრეობა შეფასდება სწორედ იმის მიხედვით, თუ რომელ გზას აირჩევს ის:

განამტკიცებს თუ არა ფუნდამენტურ ქრისტიანულ ღირებულებებს: პიროვნების ღირსებას, თავისუფლებასა და პასუხისმგებლობას, კანონის უზენაესობასა და კანონის წინაშე თანასწორობას, ნებისმიერი მთავრობისგან ეკლესიის დამოუკიდებლობას და ხელისუფლების და ეკლესიის გამიჯვნის პრინციპს;

თუ პირიქით, ნებას მისცემს საქართველოს მტრებს მართლმადიდებელი ეკლესიის სახელი სამოქალაქო თავისუფლების წინააღმდეგ, დასავლური ცივილიზაციისგან საქართველოს ჩამოსაშორებლად და საბოლოოდ, ქართული ეკლესიის და ქართული სახელმწიფოებრიობის წინააღმდეგ გამოიყენონ", — წერს გიგა ბოკერია.

შეგახსენებთ, რომ საქართველოს მართლმადიდებელი ეკლესიის გაფართოებულმა კრებამ შიო III 142-ე კათოლიკოს-პატრიარქად გუშინ, სამების საკათედრო ტაძარში გამართულ გაფართოებულ კრებაზე, 22 ხმით აირჩია.