ქართველი ოპოზიციონერი ლიდერები აშშ-ის სახელმწიფო მდივნის თანაშემწის მოადგილეს, სონატა კოლტერს შეხვდნენ. საუბარი საქართველოში არსებულ პოლიტიკურ ვითარებას და ურთიერთობას აშშ-ისა და საქართველოს შორის შეეხებოდა.

შეხვედრის შემდგომ ოპოზიციური პარტიის ლიდერებმა — პარტის ძლიერი საქართველო ლელოს ერთ-ერთმა ლიდერმა, ბადრი ჯაფარიძემ, კოალიცია ცვლილებებისთვის ლიდერმა, ზურაბ ჯაფარიძემ და გახარია საქართველოსვის წევრმა, ანა ბუჩუკურმა — ჟურნალისტებთან ისაუბრეს.

ბადრი ჯაფარიძემ ყურადღება გაამახვილა აშშ-სა და საქართველოს შორის არსებულ ეკონომიკურ ურთიერთობებსა და ჩართულობაზე ღრმაწყლოვანი პორტის მშენებლობის მიმართულებით.

"ჩვენ ვისაუბრეთ იმ მნიშნველობაზე, რომელიც ამერიკის შეერთებულ შტატებს საქართველოსთვის, მისი უსაფრთხოებისთვის, ეკონომიკისთვის აქვს, ამიტომ აშშ-ის ღრმა ჩართულობა რეგიონში არის ძალიან მნიშვნელოვანი ჩვენი ქვეყნისთის.

შესაბამისად ჩვენ მხარს ვუჭერთ იმ მცდელობებს, რომელსაც ვხედავთ აშშს მხრიდან, რომ იყოს უფრო მეტად ჩართული, მათ შორის, უმნიშვნელოვანეს ეკონომიკურ პროექტებში, რომელიც რეგიონში მიმდინარეობს, მათ შორის ღრმაწყლოვანი პორტის მშენებლობის მიმართულებით, რომელიც საქართველოსთვის ასევე უსაფრთხოების საკითხია," — განაცხადა ბადრი ჯაფარიძემ.

ზურაბ ჯაფარიძის აქცენტი საქართველოს საშინაო მდგომარეობასა და ქართული ოცნების შეუსრულებელ დაპირებებს ეხებოდა, მისი თქმით "დაპირებები არის ტყუილები და სისულელე, რადგან პარალელურად მიმდინარეობა ანტიდასავლური და ანტიამერიკული პროპაგანდა".

"როგორც წესი, ასეთ შეხვედრებზე ადამიანები როცა მოდიან ხოლმე, მომზადებულები არიან და რომ ისეთი სიახლე ვუთხარით, რაც გაგონოლი არ ჰქონდა, არა.

საუბარი იყო ასევე იმაზე, რომ რა დაპირებებსაც არ უნდა იძლეოდეს ქართლი ოცნება და ახლაც იძლევა — არის ტყუილები და სისულელე და ამის პარალელურად მიმდინარეობს ანტდასავლური და ანტიამერიკული პროპაგანდა.

ასევე იყო საუბარი იმაზეც, რომ ნამდვილი, წრფელი ურთიერთობები საქართველოსა და შტატებს შორის იქნება მხოლოდ მაშინ, როცა აქ ეს რეჟიმი შეიცვლება," — ვისმენთ ზურაბ ჯაფარაძის განცხადებაში ჟურნალისტებთან საუბრისას.

პარტია გახარია საქართველოსთვის წევრი ანა ბუჩუკური კი კანონის უზენაესობისა და სტრატეგიული პარტნიორობის მნიშვნელობას შეეხო საქართველოში სტაბილურობის უზრუნველყოფის მიზნით.

"ჩვენს სტრატეგიულ პარტნიორებს იდეალურად ესმით, რომ ქვეყანაში სტაბილურობისთვის აუცილებელი არის ორი რამ: პირველი ის, რომ ნებისმიერი ხელისუფალის ქცევა გამომდინარეობდეს და შეესაბამებოდეს ხალხის მისწრაფებებს, რაც აუცილებელია სტაბილურობისთვის და მეორე, კანონის უზენაესობა — მის გარეშე არსად არ არის შესაძლებელი ვუსაუბროთ სტაბილურობაზე," — განაცხადა ანა ბუჩუკურმა.

ცნობისთვის, ოპოზიციის წევრებთან შეხვედრამდე, აშშ-ის სახელმწიფო მდივნის თანაშემწის მოადგილე, სონატა კოლტერსი მთავრობის ადმინისტრაციაში ირაკლი კობახიძეს შეხვდა.