გარდაცვლილი მსახიობის, სერიალ Friends-ის ვარსკვლავის, მეთიუ პერის ქონების აუქციონი ივნისში გაიმართება.

მეთიუ პერიმ ცხოვრების დიდი ნაწილი ნარკოდამოკიდებულებასთან ბრძოლაში გაატარა, 2023 წლის 28 ოქტომბერს კი კეტამინის ზემოქმედებით გარდაიცვალა.

აუქციონზე წარმოდგენილ Friends-ის ნივთებს შორის 26 სცენარია. მათ შორის ისეთი ცნობილი ეპიზოდებიდანაც კი, როგორებიცაა The One with Ross's Tan, The One Where Joey Speaks French და სერიალის ორნაწილიანი ფინალიდან — The Last One. ასევე, აუქციონზე Warner Bros.-მა ორი დამატებითი სცენარიც გაიტანა, რომელიც შოუს პერსონაჟების მიერაა ხელმოწერილი.

აუქციონზე ასევე გაიტანენ მეთიუ პერის მიერ 1995 წელს მიღებულ კინომსახიობთა გილდიის ჯილდოს კომედიურ სერიალში საუკეთესო შესრულებისთვის და ისეთი ცნობილი არტისტების ნამუშევართა კოლექციას, როგორებიც არიან ბენქსი და მელ ბოხნერი.

ფოტო: Heritage Auctions

წინასწარი ფსონების მიღება სამშაბათიდან უკვე შესაძლებელია, საქველმოქმედო აუქციონი კი დალასში 5 ივნისს გაიმართება. შემოსული თანხა მოხმარდება "მეთიუ პერის მთავარ მემკვიდრეობას: ისეთი მომავლის შექმნას, რომელშიც დამოკიდებულებას აღარავინ განსჯის და სადაც განკურნების მსურველ თითოეულ ადამიანს ექნება წვდომა იმ ზრუნვაზე, რესურსებსა და მხარდაჭერაზე, რაც მათ ცხოვრების გასაგრძელებლად სჭირდებათ," — აცხადებენ აუქციონის სახლში.

"მეთიუ ფიქრობდა, რომ დამოკიდებულებას თანაგრძნობითა და მეცნიერებით უნდა ვუპასუხოთ და არა დუმილით," — ამბობს მეთიუ პერის ფონდის დირექტორი, ლიზა კასტელერ კალიო, — "ამ აუქციონით ფონდის საქმიანობას გავაფართოებთ, რათა ადამიანებს მეტი წვდომა ჰქონდეთ სანდო მკურნალობაზე. ეს კიდევ ერთი გზაა იმისათვის, რომ არავის მოუწიოს ამ დაავადებასთან მარტო ბრძოლა."