2026 წლის Met Gala-ს წითელ ხალიჩაზე დუეინ ჯონსონი შავი ფრაკით, თეთრი ბაფთითა და ქვედაბოლოთი წარდგა. ღონისძიებაზე ის მეუღლესთან, ლორენ ჰაშიანთან ხელჩაკიდებული მივიდა.

დუეინის აღნიშნული სამოსი დიზაინერ ტომ ბრაუნის ექსკლუზიური ნამუშევარია. დიზაინერის თქმით, ფრაკის შესაქმნელად 350 მეტრზე მეტი აბრეშუმის ლენტი გამოიყენეს, რამაც სამოსს ერთგვარი ჩონჩხისებური სტრუქტურა შესძინა.

ფოტო: GB News

კითხვაზე, თუ როგორ გრძნობს თავს ქვედაბოლოში, ჯონსონმა უპასუხა:

"თავს შესანიშნავად ვგრძნობ! თავდაპირველად, ტომ ბრაუნის გუნდმა ილუსტრაციები გამომიგზავნა და იკითხეს: 'საინტერესოა, დათანხმდება თუ არა დუეინი ამ ქვედაბოლოს ჩაცმას?' მე კი ვუპასუხე: 'მისმინეთ, ჩვენს პოლინეზიურ კულტურაში ლავალავა და ქვედაბოლოები ჩვეულებრივი ამბავია. ყველაზე კაცური კაცები (არ ვამბობ, რომ მათ რიცხვს მივეკუთვნები) სწორედ ლავალავებსა და ქვედაბოლოებს ატარებენ'".

ჯონსონის თქმით, მისი ჩაცმულობა ნაწილობრივ სწორედ პოლინეზიური კულტურით იყო შთაგონებული, სადაც მსგავსი სამოსი ვაჟკაცობისა და ტრადიციის სიმბოლოა.

ფოტო: Getty Images

ეს არ არის პირველი შემთხვევა, როდესაც ჯონსონმა კაცურობის საკითხზე ისაუბრა. CinemaCon 2026-ზე, Disney-ს მოანას live-action ფილმის წარდგენისას, მან აღნიშნა, რომ ნებისმიერი ასაკის კაცისთვის "ნამდვილი კაცურობა" მათ გვერდით მყოფი ქალების გაძლიერებას ნიშნავს.

"ჩვენი ისტორიის გმირი პრინცესა კი არა, მეომარია," — განუცხადა ჯონსონმა CinemaCon-ის აუდიტორიას და ხაზი გაუსვა, რომ მისი პერსონაჟის, მაუის, როლი სწორედ მთავარი გმირის გზამკვლევობა და მისი გაძლიერებაა — "ნებისმიერი ასაკის კაცმა მხარი უნდა დაუჭიროს, გააძლიეროს და დაიცვას ქალები. აი, ასე გამოიყურება ნამდვილი კაცურობა".

2026 წლის Met Gala-ს თემაა "მოდა არის ხელოვნება". წლევანდელი საღამოს თანათავმჯდომარეები ბიონსე, ნიკოლ კიდმანი, ვინუს უილიამსი და ანა ვინტური არიან.

ასევე იხილეთ: