პარტია ხალხის ძალა აცხადებს, რომ შიდა და მმართველ გუნდთან პარალელურ კონსულტაციებს მართავს, რათა გადაწყვიტოს, დაუჭერს თუ არა მხარს მამუკა მდინარაძისთვის ახალი სამინისტროს შექმნას. ამის შესახებ ინფორმაციას "ტვ პირველი" ავრცელებს.

პარტიის ერთ-ერთი ლიდერის, გურამ მაჭარაშვილის თქმით, საკითხზე განხილვები ქართულ ოცნებასთანაც მიმდინარეობს.

"ხალხის ძალას ვერავინ ასწავლის, რა გამოწვევებია ქვეყნის შიგნით თუ მის ფარგლებს გარეთ. პირველ ხაზზე ვიყავით და ვართ ყოველთვის, ამ უცხოური ძალების შემოტევებისგან. აქედან გამომდინარეობს ზუსტად ის კონსულტაციები, რაც ჩვენ გვაქვს ჯერ შიგნით და პარალელურად გვაქვს ქართულ ოცნებასთან გამომდინარე ამ საკადრო ცვლილებებიდან. ვერ გეტყვით, იქ რა საუბარი მიდის — კონსულტაციები იმიტომ არის, რომ ორი პოლიტიკური ფრაქცია რაღაცაზე თანხმდება. დავუჭერთ თუ არა მხარს — ჩვენ საბოლოო გადაწყვეტილება მიღებული გვაქვს თუ არა, ამას ჩვენ ვნახავთ. საკადრო ცვლილებები ნიშნავს იმას, რომ კანონმდებლობაში უნდა შევიდეს ცვლილება, იმიტომ რომ ახალი სამინისტრო ემატება. იცით როგორი წესით იხილება, როცა კანონში ცვლილებები შედის — სჭირდება გამოსვლები, სჭირდება მხარდაჭერა, კენჭისყრა და ასე შემდგომ", — განაცხადა მაჭარაშვილმა.

პარლამენტი მთავრობის სტრუქტურულ ცვლილებებზე მუშაობას დღეიდან იწყებს. კანონპროექტი, რომლის მიხედვითაც სამართალდამცავი ორგანოების კოორდინაციის საკითხებში სახელმწიფო მინისტრის პოზიცია იქმნება, ბიუროს წარედგინება, რის შემდეგაც შესაბამის კომიტეტში გადაინაცვლებს.

ამასთან, საპროცედურო საკითხთა კომიტეტმა სახელმწიფო უსაფრთხოების სამსახურის უფროსის მამუკა მდინარაძისთვის უფლებამოსილების ვადამდე შეწყვეტის საკითხს მხარი უკვე დაუჭირა.

ცნობისთვის, სამთავრობო ცვლილებების შესახებ განცხადება გასულ კვირას ირაკლი კობახიძემ გააკეთა. მისი თქმით, მთავრობის სტრუქტურას დაემატება სამართალდამცავი ორგანოების კოორდინაციის საკითხებში სახელმწიფო მინისტრის თანამდებობა, რომელსაც მამუკა მდინარაძე დაიკავებს და ასევე, იქნება ვიცე-პრემიერი.

ცვლილებები შეეხება შინაგან საქმეთა სამინისტროსაც — გელა გელაძეს სულხან თამაზაშვილი შეცვლის, რომელიც აქამდე აჭარის მთავრობის თავმჯდომარე იყო. მის ნაცვლად კი აჭარის მთავრობის თავმჯდომარის თანამდებობაზე ზურაბ პატარაძის კანდიდატურა წარადგინეს.