"პენ საქართველო" და ქართველი მწერლები, გამომცემლები და ლიტერატორები გმობენ ციხის ადმინისტრაციის გადაწყვეტილებას, რომლის მიხედვითაც სინდისის პატიმარ, მწერალ, ზვიად რატიანს მკაცრი რეჟმი განესაზღვრა და პაემნების რაოდენობა შეეზღუდა.

"პენ საქართველო — ხელისუფლება განსაკუთრებული სისასტიკით უსწორდება სინდისის პატიმარს, პოეტ ზვიად რატიანს

პენ საქართველო და ქართველი მწერლები, გამომცემლები და ლიტერატორები გმობენ მე-8 პენიტენციური დაწესებულების დირექციის გადაწყვეტილებას, რომლითაც სინდისის პატიმარს, პოეტ ზვიად რატიანს აღკვეთის ფორმად მკაცრი რეჟიმი განესაზღვრა, რაც მისთვის პაემნების შეზღუდვასაც ითვალისწინებს. შეგახსენებთ, რომ ზვიად რატიანი ისედაც მკაცრი რეჟიმის პირობებში, სამარტოო საკანში იხდის სასჯელს და მას არასდროს დაურღვევია ციხის შინაგანაწესი.

დოკუმენტში, რომელიც ზვიად რატიანმა ციხის ადმინისტრაციისგან 6 აპრილს მიიღო, აღნიშნულია, რომ ის „საშიშროების მომეტებული რისკის“ მქონე პატიმარია და ეს გადაწყვეტილება “საშიშროების რისკების შეფასების გუნდის საიდუმლო სხდომაზე“ იქნა მიღებული.

ზვიად რატიანის ადვოკატები გადაწყვეტილებას სასამართლოში გაასაჩივრებენ, თუმცა, მანამდე კიდევ ერთხელ უნდა აღვნიშნოთ, რომ საქართველოს ხელისუფლება განსაკუთრებული სისასტიკით უსწორდება ჩვენი დროის საუკეთესო ქართველ პოეტს, ზვიად რატიანს. მისი უკანონო პატიმრობა აუცილებლად დარჩება ქვეყნის ისტორიაში, როგორც უკიდურესად სამარცხვინო ფურცელი.

წერილი ღიაა ხელმოწერებისთვის", — განცხადებას "პენ საქართველო" სოციალურ ქსელში აქვეყენებს.

შეგახსენებთ, რომ ზვიად რატიანმა გლდანის მე-8 პენიტენციურ დაწესებულებიდან ღია წერილით მიმართა იუსტიციის მინისტრ პაატა სალიასა და გლდანის მე-8 პენიტენციური დაწესებულების ხელმძღვანელობას და ახსნა განმარტება მოითხოვა იმის შესახებ, თუ რა გახდა იმის მიზეზი, რომ სასჯელის მოხდა მკაცრი რეჟიმის პირობებში მოუწევს.