პერსონალურ მონაცემთა დაცვის ინსპექტორი, თამარ ქალდანი აცხადებს, რომ საარჩევნო უბნებზე დამკვირვებელს აქვს უფლება, დააკვირდეს ამომრჩეველთა სიებში ამომრჩეველთა რეგისტრაციას. თუმცა, მისივე განმარტებით, მნიშვნელოვანია, რომ არ შეაგროვონ მონაცემები და არ დაამუშავონ ამომრჩეველზე ზეწოლის ან სხვა არაკანონიერი მიზნებისთვის.

მოქმედი კანონმდებლობის თანახმად, ამომრჩეველთა სია საჯაროა და მასში არსებული პერსონალური მონაცემების დამუშავება უნდა ემსახურებოდეს კანონიერ მიზნებს.

პერსონალურ მონაცემთა დაცვის ინსპექტორი მოუწოდებს პოლიტიკურ პარტიებს, საარჩევნო პროცესში პერსონალური მონაცემების დამუშავება განახორციელონ კანონის დაცვით:

"ინსპექტორის აპარატი მზად არის, კომპეტენციის ფარგლებში მოახდინოს რეაგირება ამომრჩეველთა პერსონალური მონაცემების არაკანონიერი მიზნებით დამუშავების ფაქტებზე და შეისწავლოს დამკვირვებელი ორგანიზაციებისა და დაინტერესებული პირების მიერ მოწოდებული მტკიცებულებები და ფაქტობრივი გარემოებები".

დღეს, 21 ოქტომბერს თბილისის მერობის დამოუკიდებელმა კანდიდატმა, ალეკო ელისაშვილმა ბრიფინგზე თქვა, რომ ქართული ოცნების წარმომადგენლებს მხარდამჭერები ძალით მიჰყავთ საარჩევნო უბნებზე.

მმართველ პარტიაში, ქართულ ოცნებაში On.ge-ს უთხრეს, რომ მათ უპრეცენდენტოდ მაღალი მხარდაჭერა აქვთ და ამის გამო მათი აქტივობები გაცილებით თვალსაჩინოა. შეკითხვაზე, არიან თუ არა მათი კოორდინატორები და აგიტატორები საარჩევნო უბნებთან მობილიზებული, პარტიაში თქვეს, რომ ეს არის პარტიების ჩვეულებრივი საორგანიზაციო საქმიანობა.

დღეს რამდენჯერმე გავრცელდა ინფორმაცია, რომ ქართული ოცნების კოორდინატორები და აგიტატორები საარჩევნო უბნებთან ამომრჩევლის შესახებ ინფორმაციას ინიშნავენ.

მსგავსი ფაქტი On.ge-ს ჟურნალისტმაც დააფიქსირა. თბილისში, ვაშა ფშაველას გამზირზე, 64-ე სკოლის მიმდებარედ, სადაც ორი საარჩევნო უბანია განთავსებული, მოძრაობენ მოქალაქეები, რომლებიც უბანზე მისულ ამომრჩევლებს ესაუბრებიან და სიაში აღნიშვნებს აკეთებენ. იქვე დგას ამ პირების ავტომობილიც.