ბიძინა ივანიშვილმა ეროსი კიწმარიშვილის საქმის დახურვასთან დაკავშირებით, დღეს, 22 ივნისს, ჟურნალისტებთან კომენტარი გააკეთა:

"დასრულებულია გამოძიება და გადაწყვიტეს რომ ეს არის თვითმკვლელობა. სამძიმარს ვუცხადებ ოჯახს, მე სხვა არაფერი არ მექნება სათქმელი."

ტაბულას ჟურნალისტის კითხვაზე, იყო თუ არა ბიძინა ივანიშვილის ფინანსური წილი რუსთავი 2-ის საქმეში, ყოფილმა პრემიერმა არ უპასუხა და განაცხადა რომ ამაზე წარსულში საჯაროდ უკვე ისაუბრა.

ეროსი კიწმარიშვილის გარდაცვალების საქმეზე დღეს პროკურატურამ გამოძიება დაასრულა. პროკურატურის ვერსიით, კიწმარიშვილმა თავი მოიკლა და ის მიზანმიმართულად თვითმკვლელობამდე არავის არ მიუყვანია და არავის არ მოუკლავს.

ეროსი კიწმარიშვილი 2014 წლის 15 ივლისს თავისი ბინის ქვემოთ არსებულ ავტოფარეხში გარდაცვლილი იპოვეს. პროკურატურამ გამოძება იმავე დღეს საქართველოს სისხლის სამართლის კოდექსის 115-ე მუხლით დაიწყო, რომელიც თვითმკვლელობამდე მიყვანას გულისხმობს.