ლუქსემბურგში 21 აპრილს ევროკავშირის საგარეო საქმეთა საბჭოს სხდომა იმართება, სადაც მინისტრები საერთაშორისო უსაფრთხოების მნიშვნელოვან საკითხებს განიხილავენ, მათ შორის — საქართველოში არსებულ ვითარებას. ინფორმაცია ამის შესახებ ევროსაბჭოს გვერდზეა განთავსებული.

სხდომას თავმჯდომარეობს ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენელი კაია კალასი.

საბჭოს დღის წესრიგშია რუსეთის მიერ უკრაინის წინააღმდეგ წარმოებული ომი, ახლო აღმოსავლეთში მიმდინარე პროცესები, სამხრეთ კავკასია და სუდანში არსებული კონფლიქტი. უკრაინის საკითხზე მინისტრებს ვიდეოკონფერენციის ფორმატში მიმართავს ქვეყნის საგარეო საქმეთა მინისტრი ანდრიი სიბიჰა, ხოლო ახლო აღმოსავლეთის თემაზე განხილვაში მონაწილეობს ლიბანის მთავრობის ხელმძღვანელი ნავაფ სალამი.

სამხრეთ კავკასიის კონტექსტში განსაკუთრებული ყურადღება ეთმობა სომხეთთან დაგეგმილ სამიტს, აზერბაიჯანთან ურთიერთობებსა და საქართველოში მიმდინარე მოვლენებს.

აღსანიშნავია, რომ შეხვედრის დაწყებამდე კაია კალასმა საქართველოზე მკაფიო შეფასება გააკეთა.

"ჩვენ განვიხილავთ საქართველოში მიმდინარე მოვლენებს. ჩვენი მიდგომა ამ საკითხთან დაკავშირებით ძალიან მტკიცეა. ჩვენ მხარს ვუჭერთ ქართველ ხალხს, მაგრამ არა საქართველოს მთავრობას, რომელსაც ქვეყანა არასწორი მიმართულებით მიჰყავს“, — განაცხადა მან.

მისი თქმით, საქართველოს მთავრობის პოლიტიკა — ოპოზიციის ჩახშობა, მედიის შეზღუდვა, ყველა მიღებული კანონი — ევროკავშირისთვის მიუღებელია.

რაც შეეხება ქართული ოცნებისთვის სანქციების შესაძლო დაწესებაზე საუბრისას, განსაკუთრებით უნგრეთში პოლიტიკური ცვლილებების ფონზე, კალასმა აღნიშნა, რომ ევროკავშირში ამ საკითხზე დისკუსიები შეიძლება ხელახლა გააქტიურდეს.

"რა თქმა უნდა, მე ვერ ვისაუბრებ უნგრეთის ახალი მთავრობის სახელით. როგორც კი მთავრობა ჩამოყალიბდება, ისინი მოვლენ და ჩვენ შეგვიძლია მათ ყველა ეს კითხვა დავუსვათ. რა თქმა უნდა, ბევრი საკითხის გამო, რომელიც დაბლოკილია, ჩვენ ხელახლა ვხსნით დისკუსიებს და ვიმედოვნებთ, რომ დადებით შედეგს მივიღებთ“, — აღნიშნა კალასმა.