ბრიანა უისტის წიგნმა და ამ ნაშრომიდან სოციალურ ქსელში გავრცელებულმა ფრაზებმა, ციტატებმა მსოფლიოს სხვადასხვა ტიპის მკითხველი დააინტერესა. წიგნი მალევე ითარგმნა მრავალ ენაზე, დიდი ხნის განმავლობაში ეკავა მოწინავე პოზიციები გაყიდვებისა და პოპულარული წიგნების სიებშიც. ფაქტია, რომ თანამედროვე მკითხველს არა მხოლოდ მხატვრული ლიტერატურა, არამედ სწორედ ასეთი, საკუთარი თავის შემსწავლელი, დამხმარე, გზამკვლევი წიგნებიც ძალიან იზიდავს და აინტერესებს.

მთა ხარ შენ არის წიგნი-გზამკვლევი ყველასთვის, ვისაც სურს საკუთარი თავის, ცხოვრების, სულიერი თუ ფიზიკური მდგომარეობის გაუმჯობესება და, რაც მთავარია, მიზეზების გაგება, თუ რატომ ხდება ის, რაც ხდება ჩვენს თავს და როგორ გავუმკლავდეთ ამ ყოველივეს.

წიგნი საოცრად საინტერესოდაა აგებული, ყოველი თავი წინა თავში შესწავლილ, განხილულ ინფორმაციას ამატებს ახალს, უფრო მეტს და მეტს, რათა მკითხველი, რომელსაც წიგნის მეშვეობით ერთგვარი თერაპიული სესია აქვს, ნელ-ნელა განვითარდეს, გაძლიერდეს.

მხატვრული ლიტერატურისგან განსხვავებით წიგნი-გზამკვლევები პასუხგაუცემელ კითხვებს არ უტოვებენ მკითხველს. ესაა ლიტერატურა, რომელიც ადამიანის სულის ღრმა ნაწილებს წვდება, ეხმარება თითოეულ ინდივიდს, აღმოაჩინოს საკუთარი ნაკლოვანებები და პრობლემები. მთა ხარ შენ არის წიგნი, რომელიც მკითხველს პირდაპირ ესაუბრება, არ უმალავს სიმართლეს, არ ატყუებს, ფუჭად არ აიმედებს.

რატომ მთა?

ისტორიულად, მთა მეტაფორაა სულიერი გამოღვიძებისა, პიროვნული ზრდის პროცესისა და, რა თქმა უნდა, იმ გამოწვევებისა, რომლებიც გადაულახავი გვეჩვენება, როცა მთის ძირში ვდგავართ.

როგორ განიმარტება ეს მეტაფორა?

მთა, ხშირად, ჩვენ წინაშე არსებული გამოწვევა სულაც არ არის. ის ჩვენში არსებული პრობლემაა, არამყარი საფუძველი, რომელიც გარედან შესაძლოა თვალში საცემი არცაა, მაგრამ შინაგანად ჩვენი ცხოვრების თითქმის ყველა ასპექტს არყევს.

რა არის თვითსაბოტაჟი?

თვითსაბოტაჟი ისაა, რაც მაშინ გვემართება, როცა უარს ვამბობთ ჩვენი შინაგანი საჭიროებების გაცნობიერებულ მიღებაზე — ხშირად იმიტომ, რომ მათი დაძლევის შესაძლებლობისა არ გვჯერა.

ბრაზი, მწუხარება, დანაშაულის გრძნობა, უხერხულობა, შური, წყენა, სინანული, ქრონიკული შიში, ეს ის ემოციებია, რომლებიც თითოეული ადამიანისთვის კარგად ნაცნობია. რატომ უჩნდება ადამიანს ასეთი ემოციები, როგორ ამოვიცნოთ და რაც მთავარია, როგორ ვმართოთ ისინი — ამ ყველაფერზე საუბრობს ბრიანა უისტი დაწვრილებით, ეტაპობრივად და საფუძვლიანად.

ის, რასაც უნდა მოერიო, მთა კი არა, შენი თავია. — ასე სრულდება წიგნის შესავალი, ავტორი ამზადებს მკითხველს, რომ ამ წიგნ-გზამკვლევში მათ საკუთარი თავის შეცნობა, მორევა, ღირებულებათა გადაფასება და უამრავ კითხვაზე პასუხის პოვნა ელით.

სტატიის ავტორი: ნინაკო ღლონტი