მოსამართლე ეკატერინე ელიაძემ On.ge-ის გენერალური დირექტორის, ნინო ზაუტაშვილის სარჩელი საზოგადოებრივი მაუწყებლის წინააღმდეგ არ დააკმაყოფილა.

ნინო ზაუტაშვილი NEWS.On.ge-თან საუბრისას აცხადებს, რომ საზოგადოებრივი მაუწყებლის წინააღმდეგ საქმეს სასამართლოს ყველა ინსტანციაში გაასაჩივრებს, შემდეგ კი სტრასბურგის სასამართლოს მიმართავს.

"რა თქმა უნდა, მოლოდინი მქონდა, რომ საქმე ასე დასრულდებოდა, ანუ არ დააკმაყოფილებდა ქართული სასამართლო ჩემს სარჩელს. თუმცა, რაღაც მომენტი მაინც ვიფიქრე, რომ შრომით დავას რაც ეხება, ამაში მაინც გამოიჩენდა მეტ ყურადღებას სასამართლო და კონკრეტულად მოსამართლე. ძალიან გული დამწყდა და მინდა გითხრათ, რომ, თუ მე არ ვცდები და ინტუიცია თუ არ მღალატობს, არც მთლად მოსამართლე იყო ძალიან ბედნიერი იმით, რასაც აცხადებდა. მე ნამდვილად შევდივარ მის მდგომარეობაში, ნამდვილად მესმის, რომ ძალიან რთულია, როცა იმას ამბობ, რაც შენი გულიდან არ მოდის, თუმცა შეიძლება სრულიად ემოციური განცხადებაა ახლა ჩემგან და არაფერი აქვს მას საერთო სიმართლესთან.

ბრძოლას ვაგრძელებ. რა თქმა უნდა, ეს არ მომცემს არანაირ საფუძველს იმისთვის, რომ გავჩერდე და არ გავაგრძელო ბრძოლა, რომელშიც მე დარწმუნებული ვარ, რომ ვარ მართალი და ამიტომ ყველა ინსტანციას ამოვწურავ საქართველოში და ცხადია, შემდეგ მივმართავ უკვე ევროპულ სასამართლოს, სადაც დარწმუნებული ვარ, რომ იქნება მიღებული სწორი გადაწყვეტილება ჩემს საქმესთან დაკავშირებით," — განაცხადა ნინო ზაუტაშვილმა.

გარდა საზოგადოებრივი მაუწყებლიდან გათავისუფლების საქმისა, სასამართლოში შეტანილია გადაცემა "რეალური სივრცის" აღდგენის მოთხოვნის სარჩელი. ნინო ზაუტაშვილის შეფასებით, რადგან სასამართლომ მისი სამსახურიდან გათავისუფლების შესახებ სარჩელი არ დააკმაყოფილა, აღნიშნულ საქმეზეც ანალოგიური გადაწყვეტილებაა მოსალოდნელი.

"ცალკე არის "რეალური სივრცის" აღდგენის მოთხოვნის სარჩელი შეტანილი. 20-ში [აპრილს] გამოცხადდება გადაწყვეტილება ამ გადაცემასთან დაკავშირებით, მაგრამ მე ვაკავშირებ კიდევაც ამ გადაწყვეტილებას იმასთან, რაც შეიძლება 20-ში მოხდეს იმიტომ, რომ "რეალური სივრცის" დახურვის ერთ-ერთი მიზეზად ზუსტად ის იყო დასახელებული, რომ წამყვანი გაშვებულია სამსახურიდან და შესაბამისად იხურება თოქ-შოუც. რა თქმა უნდა, ეს ყველაფერი კავშირშია ერთმანეთთან, თუმცა ისევე როგორც მე, ასევე "რეალური სივრცის“ გუნდი ბრძოლას ვაგრძელებთ ნებისმიერ შემთხვევაში იმიტომ, რომ ჩვენ ვთვლით, რომ ვართ მართლები," — განაცხადა ნინო ზაუტაშვილმა.

შეგახსენებთ, რომ საზოგადოებრივი მაუწყებლის გადაცემა "რეალური სივრცის" წამყვანი ნინო ზაუტაშვილი საზოგადოებრივი მაუწყებლიდან 2025 წლის აპრილში გაათავისუფლეს. მასთან ერთად დაატოვებინეს სამსახური ასევე საინფორმაციო გამოშვება მოამბის წამყვანს ვასილ ივანოვ-ჩიქოვანს. ორივე მათგანმა საზმაუდან გათავისუფლება საქალაქო სასამართლოში 2025 წლის 8 მაისს გაასაჩივრა.