დღეს პარლამენტში ინტერპელაციის წესით საგარეო უწყების ხელმძღვანელს, მაკა ბოჭორიშვილს უსმენენ. ბოჭორიშვილმა პარლამენტის ტრიბუნიდან საქართველოში ევროინტეგრაციის პროცესზე ისაუბრა და განაცხადა, რომ "საქართველო ბევრად უფრო ახლოს არის ევროპულ სტანდარტებთან, ვიდრე სხვა კანდიდატი ქვეყნები"

"ტყუილია, რომ თითქოს, ქართულმა ოცნებამ ცალმხრივი გადაწყვეტილებით, ევროინტეგრაციის პროცესი 2028 წლამდე შეაჩერა. ქართულ ოცნებას ევროინტეგრაციის პროცესი არასოდეს შეუჩერებია — პირიქით, ხელისუფლების თანმიმდევრული პოლიტიკის შედეგად, თამამად შემიძლია ვთქვა, რომ დღეს საქართველო, სხადასხვა მიმართულებით, ბევრად უფრო ახლოს არის ევროპულ სტანდარტებთან, ვიდრე სხვა კანდიდატი ქვეყნები," — განაცხადა მაკა ბოჭორიშვილმა.

ბოჭორიშვილმა შემდეგ დასძინა, რომ "პოლიტიკური დიალოგი საქართველოსთან 2024 წელს ბრიუსელის გადაწყვეტილებით შეჩერდა და არა ქართული ოცნების.

"2014 წლიდან, საქართველომ, როგორც ევროკავშირის ასოცირებულმა პარტნიორმა ქვეყანამ სწორედ ქართული ოცნების ხელისუფლების ძალისხმევით, ყველა მიმართულებით თვალსაჩინო პროგრესს მიაღწია, რომლის უარყოფაც თავად ძალიან კრიტიკულად განწყობილ ევროპულ ბიუროკრატიას გაუჭირდა და მოუწია ამ პროგრესის აღიარება 2023 წელს, მაშინ როდესაც წელიწადნახევრის უსამართლო დაგვიანებით მიანიჭა ჩვენს ქვეყანას კანდიდატის სტატუსი თავისივე ანგარიშების და დასკვნების საფუძველზე.

საქართველოს პროგრესის, რომლის უკან სწორედ "ქართული ოცნების" ხელისუფლება დგას, დასტურია ევროკომისიის ყველა ანგარიში, რაც კი 2025 წლამდე მომზადებულა ბრიუსელში და გამოქვეყნებულა," — განაცხადა ბოჭორიშვილმა.