საგარეო და უსაფრთხოების საკითხებში ევროკომისიის პრესსპიკერი ანიტა ჰიპერი ქართული პროსამთავრობო მედიების გავრცელებულ ინფორმაციას გამოეხმაურა იმის შესახებ, რომ "ოცნების" პრემიერის, ირაკლი კობახიძის მიერ 28 ნოემბრის განცხადებამდე 5 თვით ადრე, "თავად ევროკავშირმა მიიღო გადაწყვეტილება საქართველოს გაწევრიანების პროცესის შეჩერებაზე ევროსაბჭოს დასკვნების თანახმად".

"ეს არის ფაქტების დამახინჯების კიდევ ერთი მცდელობა. ჩვენ უკვე შეჩვეულები ვართ საქართველოს ხელისუფლების მხრიდან დეზინფორმაციულ პროპაგანდას. ასე რომ, მოდით, ფაქტებში გავერკვეთ.

2024 წლის 27 ივნისს ჩვენ მივიღეთ ევროპის საბჭოს დასკვნა, რომელმაც კიდევ ერთხელ დაადასტურა დემოკრატიული უკუსვლა და ეს გახდა პირველი შემაშფოთებელი სიგნალი და მოწოდება საქართველოს ხელისუფლებისთვის, რომ შეეცვალოს არჩეული კურსი და იმის ნაცვლად, რომ დემოკრატიის დამაზიანებელი ქმედებები შეეცვალათ, ვხედავთ მხოლოდ მათ გაძლიერებას — ძლიერდება ოპოზიციაზე ზეწოლა, ჟურნალისტებს სვამენ ციხეში, მშვიდობიანი მოქალაქეები არიან თავდასხმის ქვეშ. 2024 წლის ივლისის დასკვნის გარდა, დასკვნები იყო 2024 წლის ოქტომბერში, დეკემბერში და ახლა გაფართოების ანგარიში. ამ ქმედებების შედეგი არის ის, რომ საქართველო მხოლოდ სახელით არის კანდიდატი ქვეყანა", — განაცხადა ანიტა ჰიპერმა.