Coachella მსოფლიოში ერთ-ერთი უდიდესი მუსიკალური ფესტივალია, რომელიც კალიფორნიის უდაბნოში ყოველწლიურად იმართება. ფესტივალს 2 კვირის განმავლობაში ასობით ათასი ადამიანი ესწრება, კიდევ უფრო მეტი კი მას ინტერნეტის საშუალებით ადევნებს თვალს.

2026 წლის კოაჩელა 10 აპრილს დაიწყო და პირველმა კვირამ თავი არაერთი შესრულებით დაგვამახსოვრა. საბრინა კარპენტერმა მაყურებელს შთამბეჭდავი შოუ შესთავაზა, რომელსაც Sabrinawood უწოდა; ჯასტინ ბიბერმა როგორც ახალი, ისე ძველი ჰიტები შეასრულა; Karol G კი პირველი ლათინურამერიკელი ქალი გახდა, რომელიც ფესტივალის მთავარი სცენის ჰედლაინერად წარდგა. მსმენელს სამახსოვრო პერფორმანსები შესთავაზეს სხვა შემსრულებლებმაც, რომელთა შორის არიან: Slayyyter, PinkPantheress და ედისონ რეი.

ჯასტინ ბიბერის გამოსვლა — უღიმღამო თუ შესანიშნავი?

შაბათს კოაჩელას მთავარ სცენაზე ჯასტინ ბიბერი წარდგა. ის ფესტივალის ისტორიაში ერთ-ერთი ყველაზე მაღალანაზღაურებადი ჰედლაინერი გახდა — გავრცელებული ინფორმაციით, ორკვირიან შოუებში მან $10 მილიონი მიიღო.

იმის გათვალისწინებით, რომ ბიბერს ტურნეების გაუქმების მრავალწლიანი გამოცდილება აქვს, მაყურებელს ნამდვილად გაუმართლა, რომ ის სცენაზე გამოჩნდა.

ეს ფესტივალი ბიბერისთვის პირველი სრული პერფორმანსი იყო 2022 წლის Justice მსოფლიო ტურნეს შემდეგ, რომელიც შუა გზაზე გაუქმდა. აღსანიშნავია, რომ მისი წინა, 2016-2017 წლების Purpose მსოფლიო ტურნეც ნაადრევად, ყოველგვარი განმარტების გარეშე, შეწყდა.

როდესაც ჯასტინი კოაჩელას ჰედლაინერად გამოაცხადეს, მაშინვე დაიწყო მსჯელობა იმაზე, თუ რამდენად ღირებულ შესრულებას შესთავაზებდა ბიბერი ამ ძვირადღირებული ღონისძიების მაყურებელს. შეასრულებდა თავის ვალდებულებას? მხოლოდ აუცილებელი მინიმუმით შემოიფარგლებოდა? თუ სამახსოვრო გამოსვლას შესთავაზებდა იმ ერთგულ ფანებს, რომლებიც უდაბნოში სპეციალურად მის სანახავად ჩავიდნენ?

ამ კითხვებზე პასუხი აღმოჩნდა: დიახ, დიახ და ასევე — დიახ.

ბიბერს კოაჩელას ჰედლაინერებს შორის ერთ-ერთი ყველაზე უენერგიო და უღიმღამო პერფორმანსი ჰქონდა. უბრალო, ყოველდღიურ სამოსში გამოწყობილი ჯასტინი სცენაზე უმეტესწილად მარტო და უემოციოდ მოძრაობდა. მისი შოუ ძირითადად 2025 წლის ალბომებზე, Swag-სა და Swag 2-ზე იყო აგებული.

მომღერალი მსმენელთან, რომლის ნაწილმაც ჯასტინის სანახავად ათასობით დოლარი გადაიხადა, იშვიათად ამყარებდა კონტაქტს. ამის ნაცვლად, სცენაზე დადგმულ ლეპტოპთან ჯდებოდა, საიდანაც შოუს პირდაპირი გადაცემის მაყურებლებისგან კომენტარები და სიმღერების შეკვეთები მიდიოდა. თავისი 90-წუთიანი გამოსვლის დაახლოებით მესამედი ბიბერმა სცენაზე ჯდომასა და YouTube-ის სქროლვაში გაატარა — ეძებდა მიმებს და თავისივე ძველ ჰიტებს კარაოკე სტილში მღეროდა.

ჯასტინის პერფორმანსი კოაჩელას პომპეზური და სანახაობრივი სტილისგან ძალიან განსხვავდებოდა. ინტერნეტის მომხმარებლებმა ამის საილუსტრაციოდ ჯასტინის შესრულება 2026 წლის მეორე ჰედლაინერის, საბრინა კარპენტერის, პერფორმანსს შეადარეს.

Sabrinawood ძვირადღირებული დეკორაციებითა და მრავალფეროვანი კოსტიუმებით გამოირჩეოდა. საბრინას გამოსვლაში ისეთი მსახიობები მონაწილეობდნენ, როგორებიც არიან სემ ელიოტი, სუზან სარანდონი და უილ ფერელი. სცენას უამრავი მოცეკვავე აფორმებდა, შოუს კულმინაცია კი მანქანის შადრევანში მჯდარი ბედნიერი საბრინა იყო.

საბრინასთან შედარების შედეგად, ბიბერის გამოსვლა არაერთმა მაყურებელმა გააკრიტიკა "სიზარმაცის" გამო.

X-ის ერთ-ერთმა მომხმარებელმა დაწერა: "ქალი არტისტები თავის მაქსიმუმს აკეთებენ: დაფრინავენ სცენაზე, შესანიშნავად მღერიან, უამრავ კოსტიუმსა და ფეიერვერკს გვთავაზობენ. ამ დროს კი ჯასტინ ბიბერი, კოაჩელას ყველაზე ძვირადღირებული შემსრულებელი, უბრალო მაისურით, მაკიაჟის გარეშე ზის, YouTube-ს უყურებს და ამას უტარებენ? როლები რომ შევცვალოთ, ქალ არტისტს საზოგადოება მაშინვე მიწასთან გაასწორებდა".

სხვა მომხმარებელმა კი აღნიშნა: "ფანები ბიბერის ამ საშუალო დონის პერფორმანსს იცავენ და ამბობენ, რომ ის უკვე 32 წლისაა და ნორმალურია, თუ ძველებური ენერგია აღარ აქვს. ამ დროს კი შეხედეთ 36 წლის ლედი გაგას", — რასაც დაურთო ვიდეო გაგას კონცერტიდან:

თუმცა, მიუხედავად ამ ყველაფრისა, ბიბერის გულშემატკივრების დიდი ნაწილი მომღერლის უშუალო პერფორმანსით აღფრთოვანებული დარჩა. სოციალურ ქსელებში ბევრი მათგანი აქებს და მადლობას უხდის მომღერალს ნოსტალგიით სავსე კონცერტისთვის. ისინი აღნიშნავენ, რომ კოაჩელას შესრულებამ აჩვენა, თუ რამდენად ბევრს მიაღწია ჯასტინმა კარიერის განმავლობაში. კრიტიკოსთა ნაწილმა ბიბერს ამ გამოსვლისთვის გენიოსიც კი უწოდა.