მაკდონალდს საქართველოს გუნდის წევრების პროფესიულ განვითარებაზე, მათ მოტივაციასა და განათლებაზე ზრუნვა მაკდონალდსის მთავარი ღირებულებაა. ამ ხედვის ფარგლებში, კომპანიამ ბიზნესისა და ტექნოლოგიების უნივერსიტეტთან (BTU) ურთიერთთანამშრომლობის მემორანდუმი გააფორმა, რაც თანამშრომლებისთვის განათლების ხელმისაწვდომობის გაზრდასა და ახალი კარიერული შესაძლებლობების შექმნას ისახავს მიზნად. მემორანდუმს ბიზნესისა და ტექნოლოგიების უნივერსიტეტში (BTU) ხელი მოაწერეს მაკდონალდს საქართველოს გენერალურმა დირექტორმა, თენგიზ კაპანაძემ და ბიზნესისა და ტექნოლოგიების უნივერსიტეტის (BTU) რექტორმა ნინო ენუქიძემ. მნიშვნელოვანია, რომ აღნიშული პროექტი არა მხოლოდ რესტორნის პერსონალისთვის, არამედ მაკდონალდსში დასაქმებული ყველა თანამშრომლისთვის იქნება ხელმისაწვდომი.

ამ პარტნიორობით საფუძველი ჩაეყარა მასშტაბურ პროექტს, რომელიც ახალგაზრდების კარიერულ მხარდაჭერასა და განათლებაზე აკეთებს აქცენტს.

თანამშრომლობის ფარგლებში, მაკდონალდს საქართველოს გუნდის წევრებს ეძლევათ ექსკლუზიური შესაძლებლობა, მიიღონ ხარისხიანი განათლება BTU-ს ბაზაზე, აიმაღლონ კვალიფიკაცია და დაეუფლონ მათთვის სასურველ თანამედროვე პროფესიებს საინტერესო სფეროებში. აღსანიშნავია, რომ მაკდონალდსის გუნდის დიდ ნაწილს სტუდენტები წარმოადგენენ.

“მნიშვნელოვანია აღვნიშნო, მაკდონალდსში, თანამშრომლებზე ზრუნვა და მათი მოტივაცია უმთავრესი ღირებულებაა. გვჯერა, რომ მხოლოდ ჯანსაღი სამუშაო გარემო საკმარისი არ არის. ჩვენს გუნდს უნდა ჰქონდეს განვითარების რეალური შანსი, რათა თითოეულმა წევრმა საკუთარი პოტენციალი სრულად გამოავლინოს. სწორედ ამიტომ დღეს ხელი მოეწერა მაკდონალდს და BTU-ს უნივერსიტეტს შორის მემორანდუმს, რომლის ფარგლებშიც მაკდონალდსის ყველა თანამშრომელს ექნება წვდომა უნივერსიტეტის სხვადასხვა კურსზე სრულიად უფასოდ. ვიცით, რამდენად რთულია სწავლისა და მუშაობის შეთავსება, ამიტომ ჩვენთან გრაფიკი მაქსიმალურად მოქნილია. ვცდილობთ, სტუდენტებს სწავლაში ხელი არ შეეშალოთ და პირიქით, სამუშაო პროცესი მათთვის დამატებითი გამოცდილება გახდეს. მაკდონალდსისთვის მთავარი ღირებულებაა, შევქმნათ ისეთი გარემო, სადაც თანამშრომლებს, არ მოუწიოთ არჩევანის გაკეთება კარიერასა და განათლებას შორის — ორივე იყოს მხარდაჭერილი ჩვენი მხრიდან. BTU-სთან გაფორმებული მემორანდუმი აძლევს ჩვენს თანამშრომლებს მოტივაციას, დაეუფლონ ახალ ტექნოლოგიებს და სწავლა და მუშაობა ერთმანეთის მხარდამჭერი პროცესები გახდეს. ამ ინიციატივით ჩვენს თანამშრომელს შეეძლებათ საკუთარი ინტერესების შესაბამისი ცოდნა მიიღონ, დაეუფლონ მათთვის სასურველ სფეროს და კარიერულადაც განვითარდნენ. ასევე, BTU აქტიურად ახორციელებს პროექტებს ქალების გაძლიერების მიმართულებით ტექნოლოგიებსა და ინოვაციურ პროექტებში. ჩვენთვის ამ მიმართულების მხარდაჭერა ამ პარტნიორობის მნიშვნელოვანი ნაწილია, რადგან ჩვენს სისტემაში დასაქმებულთა 60% ქალია.” — აღნიშნა ელენე ბაღათურიამ მაკდონალდს საქართველოს მარკეტინგის ხელმძღვანელმა.

პარტნიორობის ერთ-ერთი მთავარი მიმართულება ქალების ხელშეწყობაა. ვინაიდან, მაკდონალდს საქართველოში დასაქმებულთა 60%-მდე ქალია, კომპანიისთვის პრიორიტეტულია მათი ჩართულობა ტექნოლოგიურ და ინოვაციურ საგანმანათლებლო პროგრამებში. ბიზნესისა და ტექნოლოგიების უნივერსიტეტში (BTU) მიიჩნევენ, რომ მსგავსი კოლაბორაციები კერძო სექტორსა და საგანმანათლებლო დაწესებულებებს შორის აუცილებელია ქვეყნის ეკონომიკური განვითარებისა და კვალიფიციური კადრების მომზადებისთვის. უნივერსიტეტი მზად არის, მაკდონალდსის თანამშრომლებს შესთავაზოს წვდომა უახლეს ტექნოლოგიურ პროგრამებზე.

“დღეს ხელი მოეწერა სტრატეგიული თანამშრომლობის მემორანდუმს, რომელიც მიზნად ისახავს მაკდონალდსის გუნდისთვის, თანამშრომლებისთვის, ახალი თაობისთვის ინოვაციებისა და ტექნოლოგიების სფეროში არსებული შესაძლებლობების გამოყენებას. ამ გადაწყვეტილებით მივცემთ სტუდენტებს განვითარების, კარიერული წინსვლის საშუალებას ორგანიზაციაში და ისეთ შესაძლებლობებს, რომლებიც საერთაშორისო პარტნიორობის ფორმატში, ჩვენი და სხვადასხვა ტექკომპანიის თანამშრომლობის ფარგლებში არსებობს უნივერსიტეტში (BTU). იმავდროულად, ეს არის შესაძლებლობა ჩვენი სტუდენტებისთვის, ჩვენი აკადემიური გუნდისთვის გააღრმავონ საკუთარი კვლევითი საქმიანობა, მიიღონ მეტი შესაძლებლობა დასაქმების და განვითარების მიმართულებით.” — აღნიშნა ნინო ენუქიძემ, BTU-ს რექტორმა.

მაკდონალდსი რესტორნების წამყვანი გლობალური ქსელია, რომელიც მსოფლიოს 119 ქვეყანაში ოპერირებს. საქართველოში კომპანია 1999 წლიდან ფუნქციონირებს და დღეისთვის ქვეყნის მასშტაბით 28 რესტორანს აერთიანებს.

ბიზნესისა და ტექნოლოგიების უნივერსიტეტი (BTU) საქართველოში წამყვანი საგანმანათლებლო ჰაბია, რომელიც ორიენტირებულია ინოვაციებზე, მეწარმეობასა და ციფრულ ტრანსფორმაციაზე, რაც სტუდენტებს და პროფესიონალებს გლობალურ ბაზარზე კონკურენტუნარიანობის ამაღლებაში ეხმარება.