აზერბაიჯანელი ჟურნალისტი და პროევროპული აქციების აქტიური მონაწილე აფგან სადიგოვი გვიან ღამით დააკავეს. ღამის 4 საათზე კი მოსამართლე თორნიკე ქოჩქიანმა მისი მიიღო შესახებ გადაწყვეტილება მიიღო.

სადიგოვის დაკავების შესახებ ცნობა მისმა მეუღლემ, სევინჯ სადიგოვამ გაავრცელა. სადიგოვის მეუღლის მიერ გავრცელებულ კადრებში ჩანს, როგორ ცდილობს სამაშველო სამსახური ჟურნალისტის სახლის კარის შენგრევას. მეუღლის განცხადებით, კარის შენგრევის შემდეგ სადიგოვი ძალის გამოყენებით დააკავეს.

მოგვიანებით გაირკვა, რომ აზერბაიჯანელი ჟურნალისტის დაკავების მიზეზი "სოციალურ ქსელში პოლიციელის მიმართ შეურაცხყოფის ფაქტი" გახდა.

რა დაწერა სოციალურ ქსელში სადიგოვმა?

სადიგოვის დაკავებას საფუძვლად დაედო 1-ელ აპრილს სოციალურ ქსელში აზერბაიჯანულ ენაზე გამოქვეყნებული ფეისბუკპოსტი, რომელშიც ეწერა:

"იქ, სადაც დიქტატურაა, პოლიციელები მზად არიან ხელფასისა და "პაგონების" სანაცვლოდ ყველაფერი გაყიდონ და ფეხქვეშ გათელონ და ამას სიამოვნებით, მთელი გულით და სიამაყით აკეთებენ."

სოციალური სამართლიანობის ცენტრის ხელმძღვანელი თამთა მიქელაძე მოსამართლის გადაწყვეტილებას ეხმაურება და წერს, რომ "პოლიციის შესახებ პოეტური კრიტიკაც სამართალდარღვევა ყოფილა ჩვენს ქვეყანაში".

"სასამართლოში შსს-ს პოსტის თარიღი არასწორედ ქონდა მოხმობილი და პოსტი ოფიციალურად ქართულ ენაზეც არ ქონდა ნათარგმნი.

პოლიციის შესახებ პოეტური კრიტიკაც სამართალდარღვევა ყოფილა ჩვენს ქვეყანაში.
თუმცა ცხადია, რომ ეს ამბავი და საქმე მხოლოდ საბაბი იყო აზერბაიჯანელი ჟურნალისტის წინააღმდეგ", — წერს თამთა მიქელაძე.

შსს-ს განცხადება

შსს-ს ცნობით, ჟურნალისტი "თბილისის პოლიციის დეპარტამენტის თანამშრომლებმა, სასამართლოში წარდგენისა და საქმის დროულად განხილვის მიზნით" დააკავეს.

"შინაგან საქმეთა სამინისტროს თანამშრომლებმა სოციალურ ქსელში პოლიციელის მიმართ შეურაცხყოფის ფაქტზე, ადმინისტრაციულ სამართალდარღვევათა კოდექსის 173-ე მუხლით, აზერბაიჯანის მოქალაქე აფგან სადიგოვის მიმართ, დაიწყეს შესაბამისი საქმის წარმოება.
აფგან სადიგოვი სოციალურ ქსელში პოლიციელის მიმართ შეურაცხყოფის ფაქტზეა დაკავებული
აფგან სადიგოვი ქალაქ თბილისის პოლიციის დეპარტამენტის თანამშრომლებმა, სასამართლოში წარდგენისა და საქმის დროულად განხილვის მიზნით, 4 აპრილს დააკავეს.

საზოგადოებას შევახსენებთ, რომ აფგან სადიგოვი 62-ჯერ იქნა გამოვლენილი სხვადასხვა ტიპის ადმინისტრაციული სამართალდარღვევის ფაქტზე, მათ შორის შეკრება-მანიფესტაციის წესების დარღვევაზე, რისთვისაც მას ორჯერ უკვე მოხდილი აქვს ადმინისტრაციული პატიმრობა.

აფგან სადიგოვი წარდგება სასამართლოს წინაშე, სადაც ზეპირ სხდომაზე მოსამართლე იმსჯელებს ადმინისტრაციული სამართალდარღვევის ჩადენის ფაქტზე და ფაქტის დადასტურების შემთხვევაში, შესაბამისი სახდელის დაკისრებაზე", — წერს შსს.

რას წერს სადიგოვის უფლებადამცველი?

აზერბაიჯანელი ჟურნალისტის უფლებადამცველი ორგანიზაციის, სოციალური სამართლიანობის ცენტრის ხელმძღვანელი თამთა მიქელაძე სოციალურ ქსელში წერს, რომ "სასამართლომ აფგან სადიგოვის აზერბაიჯანში გაძევების გადაწყვეტილება ღამის 4 საათზე მიიღო", რაც "მიზანმიმართული სპეცოპერაციაა ამ ადამიანის მიმართ".

"მოსამართლე, თორნიკე ქოჩქიანმა პროცესზე არც ერთი ჩვენი შუამდგომლობა არ დააკმაყოფილა. საქმეს არ დაურთო მისთვის სავალდებულოდ შესასრულებელი ევროპული სასამართლოს გადაწყვეტილებაც კი.

სასამართლომ მხედველობაში არ მიიღო ის გარემოება, რომ აფგან სადიგოვის მეუღლესა და შვილებს პოლიტიკური თავშესაფარი აქვთ ევროპაში და მის მიღებას შესაბამისი ქვეყანა ასევე შეძლებდა. შესაბამისად, ჩვენ ვამტკიცებდით, რომ მას შეეძლო ნებაყოფლობით დაეტოვებინა ქვეყანა და ეს შანსი სასამართლოს მისთვის უნდა მიეცა.

ჩვენ მზად ვიყავით, შესაბამისი დოკუმენტები უმოკლეს ვადაში წარგვედგინა როგორც სასამართლოსთვის, ისე მიგრაციის დეპარტამენტისთვის.

ამდენი ხნის განმავლობაში აფგან სადიგოვს საქართველოს დატოვების საშუალებას არ აძლევდა სწორედ "ქართული ოცნების" ხელისუფლება, რის გამოც მანამდე თავშესაფრის პროცედურების დაწყება ფორმალურად შეუძლებელი იყო.

სამართლებრივი სახელმწიფოს ჩარჩოსა და კონვენციის ასეთი ხარისხის შერყევა ბოლო წლების არც ერთ საქმეში არ მინახავს.

ეს არის კატასტროფა. ეს არის მიზანმიმართული სპეცოპერაცია ამ ადამიანის წინააღმდეგ.
დააკვირდით:

1-ელ აპრილს აზერბაიჯანმა მის მიმართ სისხლისსამართლებრივი დევნა შეაჩერა და ამის შესახებ საქართველოს აცნობა.
2 აპრილს ეს ინფორმაცია მიაწოდეს აფგან სადიგოვს.
3 აპრილს სასამართლომ გააუქმა მის მიმართ გირაო და გადაადგილების შეზღუდვა.
4 აპრილს აფგან სადიგოვი დააკავეს და რამდენიმე საათში აზერბაიჯანს გადასცემენ.

ყველაფერი იყო წინასწარ დაგეგმილი და ორგანიზებული ორი ავტორიტარული რეჟიმის მხრიდან", — წერს სოციალური სამართლიანობის ცენტრის ხელმძღვანელი თამთა მიქელაძე სოციალურ ქსელში.

მეტი აფგან სადიგოვის შესახებ წაიკითხეთ აქ.