აზერბაიჯანელი ჟურნალისტი აფგან სადიგოვი, გზის გადაკეტვის გამო, შსს-მ ჯამში 275 000 ლარით დააჯარიმა. ამის შესახებ ინფორმაციას "სოციალური სამართლიანობის ცენტრი" ავრცელებს. მათი განმარტებით, ჟურნალისტი 55-ჯერ 5000 ლარით დაჯარიმდა. ის 2025 წლის 29 ივლისიდან 17 ოქტომბრამდე ჯარიმდებოდა, თუმცა, ორგანიზაციის ცნობით, მისთვის აღნიშნულის შესახებ ინფორმაცია არ მიუწოდებიათ.

"აზერბაიჯანელი ჟურნალისტი სასამართლომ 2025 წლის 23 ოქტომბერს გზის სავალი ნაწილის გადაკეტვის გამო ადმინისტრაციულ სამართალდამრღვევად ცნო და 14-დღიანი ადმინისტრაციული პატიმრობა შეუფარდა.

სასამართლოს გადაწყვეტილების მიღების შემდეგ ასევე ცნობილი გახდა, რომ აფგან სადიგოვი დამატებით 55-ჯერ დაჯარიმდა 5000 ლარით — იმავე მიზეზით. შსს მას პერიოდულად აჯარიმებდა 2025 წლის 29 ივლისიდან 17 ოქტომბრამდე, თუმცა აღნიშნულის შესახებ ამ პერიოდში სადიგოვისთვის არავის შეუტყობინებია.

აფგან სადიგოვი 2025 წლის 17 აპრილს, თითქმის 9-თვიანი პატიმრობის შემდეგ, გირაოს საფუძველზე გაათავისუფლეს. პროკურატურისა და სასამართლოს გადაწყვეტილებით, მას ქვეყნის დატოვების უფლება არ მიეცა, რის შედეგადაც ის ფაქტობრივად მოსწყდა საკუთარ ოჯახს — მეუღლესა და ქალიშვილებს, რომლებიც მესამე უსაფრთხო ქვეყანაში იმყოფებიან.

ჟურნალისტი აქტიურად მონაწილეობდა საპროტესტო აქციებში თბილისსა და ბათუმში, სოლიდარობას უცხადებდა ქართულ მედიასა და სამოქალაქო საზოგადოებას და აშუქებდა მიმდინარე მოვლენებს. მიუხედავად იმისა, რომ აფგან სადიგოვის საცხოვრებელი მისამართი და საკონტაქტო ინფორმაცია პროკურატურას ოფიციალურად ჰქონდა, მას არც ერთხელ არ მიუღია შეტყობინება ჯარიმების შესახებ", — წერია "სოციალური სამართლიანობის ცენტრის" მიერ გავრცელებულ ინფორმაციაში.

"სოციალური სამართლიანობის ცენტრის" შეფასებით, სადიგოვისთვის გამოწერილი ჯარიმები და სასამართლოს გადაწყვეტილება პროტესტში აქტიურად ჩართული აქტივისტის სამაგალითო დასჯას ემსახურება და აზერბაიჯანის ხელისუფლების ინტერესებსაც უკავშირდება, რომელიც ჟურნალისტის ბაქოში ექსტრადიციას ითხოვდა.

"აფგან სადიგოვის მიმართ ერთი მხრივ სასამართლოს მიერ მიღებული გადაწყვეტილება, ხოლო მეორე მხრივ მის წინააღმდეგ გამოწერილი ათობით ჯარიმა, ნათლად აჩვენებს მიზანს — პროტესტში აქტიურად ჩართული აქტივისტის სამაგალითო დასჯას. ეს ინტერესი, მათ შორის, უკავშირდება აზერბაიჯანის ხელისუფლების ინტერესებს, რომელიც ბაქოში ჟურნალისტის ექსტრადიციას თვეების განმავლობაში აქტიურად ითხოვდა. ექსტრადიციის პროცესის შეჩერება მხოლოდ ევროპული სასამართლოს გადაწყვეტილების შედეგად გახდა შესაძლებელი", — წერია "სოციალური სამართლიანობის ცენტრის" განცხადებაში.

ცნობისთვის, ხვალ, 5 ნოემბერს, 19:20 საათზე, აფგან სადიგოვი მარნეულის დროებითი მოთავსების იზოლატორს დატოვებს.