აზერბაიჯანელ ჟურნალისტს, აფგან სადიგოვს 7-დღიანი ადმინისტრაციული პატიმრობა შეეფარდა. მას შსს 19, 20, 21 ოქტომბერს გზის გადაკეტვას ედავებოდა.

სადიგოვი ადმინისტრაციულ პატიმრობაში უკვე იმყოფებოდა. სასამართლომ 2025 წლის 23 ოქტომბერს ის გზის სავალი ნაწილის გადაკეტვის გამო ადმინისტრაციულ სამართალდამრღვევად ცნო და 14-დღიანი ადმინისტრაციული პატიმრობა შეუფარდა.

"ყოველდღე ვიყავი აქციაზე, გზა გადამიკეტია. ამის შემდეგაც ყოველდღე გავალ აქციაზე. საქართველოს კანონმდებლობას პატივს ვცემ, მაგრამ დიქტატორი ივანიშვილის კანონებს ვეწინააღმდეგები", — თქვა სადიგოვმა სასამართლო პროცესზე.

"22 ოქტომბერს, როდესაც შსს-მ აფგან სადიგოვი დააკავა და ადმინისტრაციული საქმის განხილვის მიზნით სასამართლოს მიმართა, უწყებისთვის ასევე ცნობილი იყო, რომ სადიგოვი პარლამენტის მიმდებარე ტერიტორიაზე 19-21 ოქტომბერსაც იმყოფებოდა და გზის სავალ ნაწილზე იდგა. ეს ფაქტი თავად შსს-ს მიერ სასამართლოსთვის წარდგენილი საქმის მასალებით დასტურდება. მიუხედავად ამისა, შსს-მ პირველ ეტაპზე მხოლოდ 18 ოქტომბრის ფაქტის განხილვა მოითხოვა, და მხოლოდ მას შემდეგ, რაც სადიგოვი სასამართლომ სამართალდამრღვევად ცნო და ის დროებითი მოთავსების იზოლატორში იმყოფებოდა, უწყებამ კვლავ მიმართა სასამართლოს.

ეს გარემოება კიდევ ერთხელ მიუთითებს, რომ შსს-მ განზრახ არ მიმართა სასამართლოს დანარჩენ დღეებთან დაკავშირებით, რათა სასამართლოს ორჯერ ჰქონოდა შესაძლებლობა აფგან სადიგოვის მიმართ ადმინისტრაციული პატიმრობა გამოეყენებინა. აშკარაა, რომ შსს ცდილობს სასამართლოს მეშვეობით პროტესტში აქტიურად ჩართული აქტივისტი სამაგალითოდ დასაჯოს.

ამასთან, აფგან სადიგოვს წარმოების არც ერთ ეტაპზე მისთვის გასაგებ ენაზე არ გადასცემია ადმინისტრაციული საქმის მასალები, რაც არღვევს მისი, როგორც სამართალწარმოების მონაწილის, საპროცესო უფლებებს", — წერს სოციალური სამართლიანობის ცენტრი.