პარლამენტის თავმჯდომარის, ირაკლი კობახიძის განცხადებით, პრეზიდენტის დღევანდელი ბრიფინგის შინაარსი მისთვის "აბსოლუტურად" გაუგებარი იყო. ამის შესახებ მან ტვ პირველის გადაცემა რეაქციის ეთერში განაცხადა:

"ჩვენ ვთქვით, რომ ვეტოს გადალახვის შემთხვევაში, კონსტიტუციის ხელმოწერა იყო მხოლოდ და მხოლოდ ტექნიკური საკითხი. პრეზიდენტს მარტივად, ტექნიკურად რომ მოეწერა ხელი, ვეტოს გადალახვის შემდეგ, აბსოლუტურად გასაგები მოვლენაა. თუმცა პრეზიდენტმა ამას მიუძღვნა საგანგებო ბრიფინგი, რაც იყო აბსოლუტურად გაუგებარი".

მისი თქმით, ბრიფინგის ჩატარების მიზანი არა კონსტიტუციაზე საუბარი, არამედ წინასაარჩევნო განცხადების გაკეთება იყო. კობახიძის განცხადებით, პრეზიდენტმა კონსტიტუციის არადემოკრატიულობაზე ისაუბრა და ამავე დროს მოსახლეობას არჩევნებზე აქტიურობისკენ მოუწოდა. მისივე განმარტებით, ეს იყო ოპოზიციური პარტიის მხარდაჭერისკენ მოწოდება:

"სხვათა შორის, მან იგივე გააკეთა 2016 წლის საპარლამენტო არჩევნებამდე, როდესაც ჩვენ გვქონდა წინასაარჩევნო ნამდვილი ომი ნაციონალურ მოძრაობასთან. მაშინაც განაცხადა, რომ ხმას აძლევდა მრავალპარტიულ პარლამენტს და ეს იყო პირდაპირ მოწოდება ოპოზიციის სასარგებლოდ არჩევანის გაკეთებისკენ. მადლობა ღმერთს, რომ პრეზიდენტის ხმას არ ჰქონდა შესაბამისი წონა და საბოლოოდ ჩვენ მოვახერხეთ გამარჯვება და გაგრძელდა შეუქცევადი დემოკრატიული პროცესი".

როგორც კობახიძე ამბობს, გიორგი მარგველაშვილი თვითმმართველობის არჩევნებში დამარცხდება ისე, როგორც 2016 წლის არჩევნებში დამარცხდა:

"სხვათა შორის, ის დამარცხდა 2013 წელსაც საპრეზიდენტო არჩევნებში იმიტომ, რომ მაშინ ხალხმა აირჩია არა გიორგი მარგველაშვილი, არამედ ქართული ოცნება და ეს იყო მარგველაშვილის დამარცხება".

დღეს, 19 ოქტომბერს, გიორგი მარგველაშვილმა საგანგებო ბრიფინგზე განაცხადა, რომ საკონსტიტუციო ცვლილებებს ხელი მოაწერა. პრეზიდენტის განმარტებით, მისი დღევანდელი გადაწყვეტილება სახელმწიფოს ინტერესებიდან გამომდინარე გადადგმულ ნაბიჯად უნდა განიხილებოდეს.

13 ოქტომბერს რიგგარეშე სხდომაზე ქართულმა ოცნებამ საქართველოს პრეზიდენტის მოტივირებული შენიშვნები არ გაითვალისწინა და კონსტიტუციის პროექტზე დადებული ვეტო დაძლია და კანონპროექტის პირვანდელ რედაქციასაც უყარა კენჭი.