საქართველოს სოფლის მეურნეობის მინისტრმა ლევან დავითაშვილმა, დღეს, მთავრობის სხდომის დასრულების შემდეგ, თქვა, რომ წლის ბოლოს დაითვლიან, თუ რა ზარალი გამოიწვია აზიური ფაროსანას გავრცელებამ.

მინისტრის ინფორმაციით, ჯერ კიდევ მიმდინარეობს სასოფლო-სამეურნეო პროდუქციის დაბინავება და სწორედ ამიტომ რთულია ამ ეტაპზე ზარალის განსაზღვრა. კითხვაზე, ხელისუფლება მოსახლეობას აუნაზღაურებს თუ არა ზარალს, მინისტრი პასუხობს, რომ ეს არ მოხდება და ცრუ დაპირებებს ვერ გასცემენ.

ლევან დავითაშვილი ამბობს, რომ მავნებელი აზიური ფაროსანა მხოლოდ საქართველოს პრობლემა არაა და მას ებრძვიან როგორც იტალიაში, ისე - ესპანეთში, შვეიცარიასა და აშშ-ში. მინისტრის ინფორმაციით, აზიური ფაროსანა დასავლეთ საქართველოს ტერიტორიაზე აფხაზეთიდან შემოვიდა და თუ არ მოხდა მის წინააღმდეგ კომპლექსური ბრძოლა, ის, შესაძლოა, იმ ადგილებშიც გავრცელდეს, სადაც ახლა არ არის.

"საქართველოს ხელისუფლებამ გააკეთა ყველაზე მეტი, თუ სადმე რომელიმე ხელისუფლებას რამე გაუკეთებია ამ მავნებლის წინააღმდეგ", - თქვა დავითაშვილმა და აღნიშნა, რომ ხელისუფლების ქმედებებთან ერთად, აუცილებელია მავნებლის წინააღმდეგ ბრძოლის პროცესში თითოეული ფერმერიც ჩაერთოს, წინააღმდეგ შემთხვევაში, ყველა ღონისძიება ფუჭი იქნება.

აზრიური ფაროსანა არის მავნებელი მწერი, რომელიც ანადგურებს ხილსა და ბოსტნეულს ნებისმიერ სეზონზე. ამ მავნებელმა უკვე მიაყენა მნიშვნელოვანი ზიანი დასავლეთ საქართველოს მოსახლეობას.