მოსამართლე ნინო გალუსტაშვილმა ეკონომიკის მინისტრის ყოფილ მოადგილეს, რომეო მიქაუტაძეს 10-წლიანი პატიმრობა და ქონების ჩამორთმევა მიუსაჯა.

მიქაუტაძეს ესპანეთსა და მცხეთაში უძრავი ქონება, მის მეუღლის სახელზე დარეგისტრირებული 3 მანქანა — Mercedes-Benz, RANGE ROVER და Lexus ჩამოერთვა.

"სასამართლომ სრულად გაიზიარა ბრალდების მხარის მტკიცებულებები და რომეო მიქაუტაძე ყველა ბრალდებაში დამნაშავედ ცნო. მოგეხსენებათ, მას ბრალი ედებოდა სხვადასხვა კორუფციულ დანაშაულში, ასევე უკანონო შემოსავლის ლეგალიზაციაში. სასჯელის სახით მას 10 წლით თავისუფლების აღკვეთა განესაზღვრა. მას ასევე ჩამოერთვა სხვადასხვა ქონება - უძრავი ქონებები, მათ შორის, ესპანეთში მდებარე ბინა, 3 ავტომანქანა, ასევე ძვირადღირებული საათები, ოქროს ზოდები, მონეტები. გარდა ამისა, ჩამოერთვა შპს "ნახიდურჰესში" 15%-იანი წილი, რომლის ღირებულებაც იმ პირობებში რომ ჯერ ჰესი ამუშავებული არ არის, 1 500 000 ლარს შეადგენს. უძრავ ქონებებში ასევე შედის წეროვანის ქონებაც," — განაცხადა პროკურორმა, ირაკლი მარშანიამ.

განაჩენის გამოცხადებას ბრალდებული არ დაესწრებია. ოცნების ყოფილი მაღალჩინოსნის ადვოკატების ინფორმაციით, განაჩენს სააპელაციო სასამართლოში გაასაჩივრებენ.

რადიო თავისუფლების ინფორმაციით, მიქაუტაძემ დასკვნით სასამართლოზე სიტყვის უფლებით ისარგებლა და განაცხადა, რომ მზად იყო აღიარებინა "არარსებული დანაშაული" და აენაზღაურებინა "არარსებული ზარალი", თუ მას მიეცემოდა საშუალება შვილიშვილის დაბადებას დასწრებოდა.

შეგახსენებთ, 2025 წლის 21 ივნისს, ანტიკორუფციულმა სააგენტომ რომეო მიქაუტაძე დააკავა. პროკურატურის ინფორმაციით, მიქაუტაძეს 9 ბრალი ჰქონდა წარდგენილი და ₾8, 5 მლნ-ის უკანონო დაუსაბუთებელი ლეგალიზაცია ედებოდა ბრალად.

პროკურატურაში ბრიფინგზე განაცხადეს, რომ თანხის თაღლითური მითვისების ერთ-ერთი ინციდენტის დროს რომეო მიქაუტაძემ €600 ათასი ლეგალური წარმომავლობის დასაბუთების მიზნით დაამზადა ყალბი ოფიციალური დოკუმენტი, ნასყიდობის ხელშეკრულება, რომლის მიხედვით, თითქოს, ბრალდებულის მეუღლის სახელზე რეგისტრირებულ უძრავ ქონებაში €600 ათასი უნდა გადაეხადა ხელშეკრულებაში მყიდველად ფიქციურად დაფიქსირებულ პირს, ბრალდებულის მეგობრის პენსიონერ დედას. რეალურად კი, ბრალდებულის ოჯახს ეს ქონება არ გაუსხვისებია და ხელშეკრულების მიზანი იყო მხოლოდ ესპანეთში გადასარიცხი თანხის წარმომავლობის შენიღბვა.

მიქაუტაძეს, კორუფციული საქმიანობის შედეგად მიღებული უკანონო და დაუსაბუთებელი ქონებისათვის წარმოშობის წყაროს დამალვის და შენიღბვის მიზნით, შეძენილი აქვს ორი ავტომანქანა — 2023 წელს გამოშვებული MERCEDES BENZ G 63 AMG და 2023 წელს გამოშვებული LAND ROVER RANGE ROVER, რომელთა ღირებულებაც ჯამში ₾842 592 შეადგენს. აღნიშნული ავტომანქანები ფორმალურად გააფორმა მისი და მისი მეუღლის ნდობით აღჭურვილ პირებზე.

მიქაუტაძეს ბრალი სსსკ-ის 332-ე მუხლის მე-2 ნაწილით და 194-ე მუხლის მე-3 ნაწილის "გ" ქვეპუნქტით ჰქონდა წარედგენილი, რაც სასჯელის სახედ და ზომად 12 წლამდე პატიმრობას ითვალისწინებს.

2017 წლიდან რომეო მიქაუტაძე ენერგეტიკის მინისტრის მოადგილის პოსტს იკავებდა. 2018 წელს, ენერგეტიკის სამინისტროს ეკონომიკის სამინისტროსთან გაერთიანების შემდეგ, იგი ეკონომიკის მინისტრის მოადგილედ დაინიშნა და ენერგეტიკის სფეროში მოქმედ კომპანიებს კურირებდა. 2021–2022 წლებში მიქაუტაძე კვლავ ეკონომიკის მინისტრის მოადგილე იყო, ხოლო 2022 წლის 30 დეკემბრიდან 2024 წლის 9 თებერვლამდე — ეკონომიკის მინისტრის პირველი მოადგილე.

რომეო მიქაუტაძე სუს-ის ყოფილი უფროსის, გრიგოლ ლილუაშვილის საქმეშიც ფიგურირებს.