ყოფილმა თავდაცვის მინისტრმა, ჯუანშერ ბურჭულაძემ სასამართლო პროცესზე განაცხადა, რომ "მორალურ პასუხისმგებლობას და ფინანსურსაც, თუ იქნება, გაიაზრებს". მისი თქმით, თუ სამინისტროში რაღაც არასწორი გაკეთდა, ეს მისი ცოლის ძმის ქმედებით იქნებოდა გამოწვეული, თუმცა, "ჯოხის სხვაზე გადატეხვას არ აპირებს'

"მე სხვა მუხლი მაქვს წაყენებული, ჩემს ოჯახის წევრს და ჩემს ყოფილ მოადგილეს, სხვა მუხლი, მაგრამ არ მინდა ისე წარმოჩინდეს, რომ მხოლოდ ჩემი თავი წარმოვაჩინო. მინდა დაგანახოთ, სიმართლე როგორ იყო. რა თქმა უნდა, ეს არის ჩემი პირველი ამოცანა. რა თქმა უნდა, მორალურ პასუხისმგებლობას და ფინანსურიც თუ იქნება, გავიზიარებ - ეს იყო ჩემი ცოლის ძმის რაღაც ქმედების გამო გამოწვეული, თუ სამინისტროში რაღაც არასწორი გავაკეთეთ. არ ვაპირებ ჯოხის სხვაზე გადატეხვას, მინდა იცოდეთ, რომ ორივე შემთხვევაში, ბრალეულობა გამოიკვეთება თუ არა, ჩემი ცოლის ძმის თუ თანამშრომლების, ამ პასუხისმგებლობას გავიზიარებ, სამართლებრივად შეიძლება მე შემეხოს, მაგრამ მორალურად პასუხისმგებლობას ყველა შემთხვევაში გავიზიარებ," — განაცხადა ყოფილმა თავდაცვის მინისტრმა ჯუანშერ ბურჭულაძემ სასამართლო პროცესზე.

11 სექტემბერს, ჯუანშერ ბურჭულაძე, მისი მოადგილე გიორგი ხაინდრავა და ცოლის ძმა ვასილ მხეიძეც დააკავეს. ყოფილ მაღალჩინოსანს სამსახურებრივი უფლებამოსილების გადამეტება და ფულის გათეთრება ედება ბრალად.

თავდაცვის ყოფილი მინისტრი ჯუანშერ ბურჭულაძე დააკავეს

ჯუანშერ ბურჭულაძე: "იმედს ვიტოვებ, რომ ეს უსამართლობა უმოკლეს დროში დასრულდება"

ბურჭულაძემ და მასთან ერთად დაკავებულმა პირებმა სამინისტროს მიერ მაგნიტურ-რეზონანსული ტომოგრაფიის აპარატის შეძენის პროცესში მიზანმიმართული ქმედებებით შექმნეს არაკონკურენტული გარემო, რის შედეგადაც უწყებას სამედიცინო დანადგარების შეძენით ₾1,3 მლნ ქონებრივი ზარალი მიადგა.