სასამართლომ დააკმაყოფილა პროკურატურის მოთხოვნა და თავდაცვის ყოფილ მინისტრს, ჯუანშერ ბურჭულაძეს წინასწარი პატიმრობა შეუფარდა — გადაწყვეტილება მოსამართლე ეკა ბარბაქაძემ მიიღო. პროკურატურის განმარტებით, აღმკვეთი ღონისძიების სახით პატიმრობას ითხოვენ, რადგან არსებობს მიმალვის ან მოწმეებზე ზემოქმედების შანსი.

სასამართლო პროცესზე ბრალდებულის ადვოკატმა, დიმიტრი ხაჩიძემ მოსამართლეს აღმკვეთი ღონისძიების სახით პატიმრობის სანაცვლოდ 100 000 ლარის გირაოს დაწესება მოითხოვა. ადვოკატმა ასევე დასძინა, რომ არ არსებობს მოწმეებზე ზემოქმედების საშიშროება და ბურჭულაძე მზადაა პასპორტი სასამართლოს გადასცეს.

პროცესს ბურჭულაძეც ესწრებოდა — ბრალდებულის ადვოკატის ინფორმაციით, მას ტვინის შერყევაა აქვს მიღებული და წოლითი რეჟიმი ესაჭიროება. ჯუანშერ ბურჭულაძემ სასამართლო პროცესზე განაცხადა, რომ მისადმი წაყენებული ბრალი "მოუმზადებელია" და ის "სხვა მოტივით" დააკავეს.

"თუ უფლებას მომცემთ, შევაფასებ ბრალის ხარისხს — ევროპულობასთან არანაირი კავშირი არ აქვს, ჩემთვის წარმოუდგენელია ასეთი მოუმზადებელი ბრალის წაყენება და ეჭვი მაქვს, რომ მოტივირებულია სულ სხვა რაღაცით.

რაც შეეხება ნასყიდობას, რომ აგიხსნათ ბატონო მოსამართლე, ნასყიდობა მე დავასაბუთე და მას არანაირი კავშირი არ აქვს ჩემს წყნეთის სახლთან ლეგალიზაციის თვალსაზრისით.

მე არასოდეს მიხსენებია, რომ ჩემი საბოლოო შემოსავალი, რომლითაც მე გავისტუმრე ნასყიდობის ვალდებულება, იყო წყნეთის სახლი… მინდა დაგანახოთ, ხელი შეგიწყოთ პირადი მრწამსის შესაქმნელად, ჩემი დაკავება რამდენად აბსურდულია…

მე იპოთეკით დავტვირთავდი თუ ნასყიდობას გამოსყიდვის უფლება იქნებოდა, ჩემი გადასაწყვეტია… ესპანეთის სახლის ქონება გადავიხადე დედაჩემის ქონებით და ჩემი ქონების გაყიდვით…

რაც შეეხება დეკლარაციას, ამ სახლს დეკლარაცია არ უწევდა, 2025 წელს შევიძინე. ამ სახლს არ ვმალავდი, გამოკითხვაზე მე თავად ვუთხარი და ხელშეკრულებაც მივიტანე… არანაირი მოწმე არ არსებობს, თუ არ ჩავთვლით ირიბ მოწმეს… 8 შვილის მამა ტვინის შერყევით გინდათ, რომ გამიშვათ ციხეში," — თქვა ბურჭულაძემ (ტექსტი "რადიო თავისუფლება")

11 სექტემბერს, თავდაცვის ყოფილი მინისტრი ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება. შემდეგი სხდომა 3 ნოემბერს ჩაინიშნა.