მეფე ჩარლზ III-ის უმცროსი ძმა, ენდრიუ მაუნტბატენ-უინძორი, რომელიც ხუთშაბათს, 19 თებერვალს, ამერიკელ ფინანსისტ ჯეფრი ეპშტეინთან მისი კავშირების გამოძიების ფარგლებში დააკავეს და იმავე საღამოს, თითქმის 12-საათიანი დაკითხვის შემდეგ, პოლიციის პატიმრობიდან გაათავისუფლეს. BBC-მ და რამდენიმე გაზეთმა, რომლებმაც ეს ამბავი გაავრცელეს, გამოაქვეყნეს ფოტო, რომელიც ადასტურებს ინფორმაციას, რომ 66 წლის მაუნტბატენ-უინძორი ნორფოლკში, აილსშემის პოლიციის განყოფილებიდან შინ ბრუნდება.

პოლიციამ განცხადება გაავრცელა, რომ ყოფილი პრინცი საჯარო სამსახურებრივი მოვალეობის შესრულებისას არასათანადო მოპყრობის ბრალდებით დაკავების შემდეგ, "გამოძიების ფარგლებში გათავისუფლდა. ეს ნიშნავს იმას, რომ გამოძიება გრძელდება, მაგრამ მაუნტბატენ-უინძორისთვის ჯერ ბრალი არ წაუყენებიათ.

ენდრიუ მაუნტბატენ-უინძორის დაკავების შესახებ პოლიციის განცხადებაში მისი სახელი პირდაპირ არ იყო ნახსენები. კითხვაზე, იყო თუ არა ის დაკავებული პირი, პოლიციამ განაცხადა, რომ "დააკავეს 60 წელზე უფროსი ასაკის კაცი". მათ ასევე განაცხადეს, რომ საქმესთან დაკავშირებით ორ მისამართზე ჩხრეკა ჩატარდა.

რის გამო დააკავეს ყოფილი პრინცი?

Associated Press-ის ცნობით, პოლიცია იძიებს ბრალდებებს იმის შესახებ, რომ ყოფილმა პრინცმა ენდრიუმ 2010 წელს მსჯავრდებულ სექსუალურ დამნაშავეს, ჯეფრი ეპშტეინს, გაუგზავნა სავაჭრო ანგარიშები. პოლიციამ საქმის გამოძიება შეერთებულ შტატებში ეპშტეინის გამოძიების დროს შეგროვებული მილიონობით დოკუმენტის გამოქვეყნების შემდეგ დაიწყო.

პოლიციის განცხადების თანახმად, სამეფო ოჯახის წევრი ეჭვმიტანილია სამსახურებრივი მოვალეობის შესრულებისას თანამდებობის ბოროტად გამოყენებაში. ენდრიუს ადრე ჩამოერთვა პრინცის ტიტული ეპშტეინთან მისი ახლო კავშირების გამჟღავნების შემდეგ, რომელიც არასრულწლოვნების სექს-ტრეფიკინგში იყო ბრალდებული და 2019 წელს ციხის საკანში ჩამოხრჩობილი იპოვეს.

სამეფო ოჯახის პოზიცია

მაუნტბატენ-უინძორი მუდმივად უარყოფდა ეპშტეინის საქმესთან დაკავშირებულ ნებისმიერ დანაშაულს და აცხადებს, რომ ნანობს მასთან მეგობრობას.

ჩარლზ III გამოძიებას სრულ მხარდაჭერასა და თანამშრომლობას დაჰპირდა. მან განაცხადა, რომ "ღრმად შეშფოთებულია" უმცროსი ძმის დაპატიმრების შესახებ ინფორმაციით, მაგრამ პირობას დებს, რომ სამეფო ოჯახი სრულ მხარდაჭერასა და თანამშრომლობას გაუწევს სამართალდამცავ ორგანოებს, რომლებიც ჩაატარებენ "სრულ და სამართლიან გამოძიებას".

"მინდა ნათლად განვაცხადო: კანონი უნდა აღსრულდეს. სანამ ეს პროცესი მიმდინარეობს, ჩემთვის ამ საკითხზე დამატებითი კომენტარის გაკეთება შეუფერებელი იქნება. ამასობაში, მე და ჩემი ოჯახი გავაგრძელებთ ჩვენი მოვალეობის შესრულებას და ყველას მოგემსახურებით", — ნათქვამია ბრიტანეთის მეფეს განცხადებაში.