ჰანა მონტანას 20 წლის იუბილესთან დაკავშირებით, მაილი საირუსი სპეციალურ ეპიზოდს ჩაწერს. ინფორმაციას სოციალურ ქსელებში Disney+ ავრცელებს.

როგორც პრესრელიზში ვკითხულობთ, გრემის მფლობელი მუსიკოსი გადაცემას Call Her Daddy-ის წამყვან ალექს კუპერთან ერთად ჩაწერს. გადაცემას ექნება პოდკასტის ფორმატი, სადაც საირუსი და კუპერი სერიალის გადაღების პროცესზე, მოგონებებსა და მის ზეგავლენაზე ისაუბრებენ.

გარდა ამისა, გადაცემაში ჯერ კიდევ უცნობ კადრებსა და სერიალის საუკეთესო ეპიზოდებს ვიხილავთ. Disney+ აღნიშნავს, რომ ეპიზოდს სტიუარტების ოჯახის მისაღები ოთახით შთაგონებულ სივრცეში გადაიღებენ და ცალი თვალით ჰანა მონტანას საგარდერობო ოთახშიც შეგვაჭყეტებენ.

ფოტო: Disney

2006 წელს გამოსული სერიალი მალევე იქცა პოპკულტურის სენსაციად. 13 წლის მაილი საირუსმა მაყურებლებს თავი თავისი ვოკალური მონაცემებით, ცეკვითა და იუმორით შეგვაყვარა. მას შემდეგ, საირუსმა დისნეის ლეგენდარული ვარსკვლავის ტიტული მოიპოვა.

"ჰანა მონტანა ყოველთვის იქნება ჩემი ცხოვრების განუყოფელი ნაწილი", — ამბობს საირუსი — "ამ სატელევიზიო შოუმ როგორც ჩემი, ისე უამრავი ადამიანის ცხოვრება შეცვალა და ამისთვის მთელი ცხოვრება მადლიერი ვიქნები. მეამაყება, რომ წლების შემდეგ ჰანა მონტანა ადამიანებისთვის ისევ ბევრს ნიშნავს.".

ფოტო: Getty Images

რაც შეეხება საირუსის მუსიკალურ კარიერას, გრემის მფლობელმა მომღერალმა გასულ წელს ახალი ალბომი, Something Beautiful, გამოუშვა. ამ უკანასკნელმა, 2026 წლის გრემიზე ნომინაცია მოიპოვა წლის საუკეთესო პოპ ვოკალური ალბომის კატეგორიაში. გარდა ამისა, 2025 წელს საირუსის გულშემატკივრებმა ავატარის ახალი ფილმისთვის შექმნილი სინგლი, Dream As One, მოისმინეს.

ჰანა მონტანას 20 წლის იუბილესდმი მიძღვნილ გადაცემას 2026 წლის 24 მარტს, Disney+-ზე ვიხილავთ.