პოლიციის განცხადებით, მსახიობ შაია ლაბაფს, სამშაბათს, ნიუ ორლეანში, ორი პირის მიმართ განხორციელებული მარტივი ფიზიკური ძალადობის (simple battery) ორი მუხლით წაუყენეს ბრალი.

ნიუ ორლეანის ფრანგულ კვარტალში მდებარე უბანში, სადაც რესტორნები, სასტუმროები და მაღაზიებია, მას შემდეგ, რაც ძალადობის შესახებ შეტყობინება მიიღეს, დაახლოებით 00:45 საათზე გამოიძახეს სამართალდამცავები, ნათქვამია ნიუ ორლეანის პოლიციის დეპარტამენტის განცხადებაში.

გამომძიებლების თქმით, 39 წლის ლაბაფმა ერთ-ერთ დაწესებულებაში არეულობა გამოიწვია და "სულ უფრო აგრესიული ხდებოდა", რის გამოც თანამშრომელმა მისი გაყვანა სცადა.

მას შემდეგ, რაც ლაბაფი დაწესებულებიდან გაიყვანეს, ერთ-ერთმა დაზარალებულმა განაცხადა, რომ "ლაბაფმა რამდენჯერმე დაარტყა შეკრული მუშტებით".

დაზარალებულის თქმით, ლაბაფი წავიდა, თუმცა მალევე დაბრუნდა და კიდევ უფრო აგრესიულად იქცეოდა. მის შეკავებას რამდენიმე ადამიანი ცდილობდა, მაგრამ მან კვლავ განაგრძო ფიზიკური აგრესია და ორ ადამიანს გაუსწორდა.

გვიან ღამით TMZ-მ გაავრცელა ვიდეო, სადაც ჩანს, როგორ უსწორდება რამდენიმე ადამიანი მსახიობს ფიზიკურად.

მიღებული დაზიანებების გამო საავადმყოფოში მკურნალობის შემდეგ, ლაბაფი დააკავეს და მას ადმინისტრაციული დანაშაულით, მარტივი ფიზიკური ძალადობის ორი მუხლით წაუყენეს ბრალი.

ლაბაფს, რომელიც ცნობილია ფილმებით Transformers, Megalopolis და სხვა, ძალადობრივ ქცევაში წარსულშიც დასდეს ბრალი. 2020 წლის დეკემბერში მისმა ყოფილმა პარტნიორმა, მუსიკოსმა FKA twigs-მა, სექსუალური ძალადობისა და ფიზიკური თავდასხმისთვის სასამართლოში უჩივლა.

სარჩელის შეტანის შემდეგ ლაბაფმა The New York Times-ს განუცხადა, რომ ბევრი ბრალდება სიმართლეს არ შეესაბამებოდა და რომ "ალკოჰოლიზმსა და აგრესიას გამართლების მიზეზები არ აქვს, მხოლოდ ახსნები". მან ასევე თქვა, რომ წლების განმავლობაში ზიანს აყენებდა როგორც საკუთარ თავს, ისე სხვებს და დასძინა: "ამის გამო მრცხვენია და ბოდიშს ვუხდი მათ, ვისაც ვატკინე"

გასულ ზაფხულს ლაბაფმა და FKA twigs-მა საქმე მორიგებით დაასრულეს, რაც ლაბაფის ადვოკატის თქმით "კონსტრუქციული წინსვლის გზის გამონახვის" სულისკვეთებით მოხდა.