ბევრი ადამიანისთვის დილა ყავითა და სოციალური ქსელების დათვალიერებით იწყება, თუმცა გამოსაფხიზლებლად ორგანიზმს ყავაზე მეტად სინათლე სჭირდება. ეზოში, აივანზე თუ ფანჯარასთან, მზის სხივების ქვეშ გატარებული სულ რაღაც 10 წუთი ენერგიული დღისა და მშვიდი ძილის საწინდარია.

ფოტო: Unsplash

რა სარგებელი მოაქვს მზის სხივებს?

ფოტო: Village Life

გვიუმჯობესებს განწყობას

მზის სინათლე ტვინში სეროტონინის — ბედნიერების ჰორმონის — გამოყოფას უწყობს ხელს. დეპრესიისა თუ ცუდი განწყობის ძირითადი მიზეზი ხშირად სწორედ სეროტონინის ნაკლებობაა ორგანიზმში (განსაკუთრებით ზამთარში, როცა მზეს იშვიათად ვხედავთ). კვლევები ადასტურებს, რომ ადამიანები, რომლებიც გარეთ მეტ დროს ატარებენ, თავს ემოციურად ბევრად უფრო სტაბილურად გრძნობენ. ასე რომ, თუ გრძნობთ, რომ ხასიათი გაგიფუჭდათ, შენობაში გამოკეტვის ნაცვლად, გარეთ გადით და მზის სხივებს მიეფიცხეთ.

გვეხმარება მნიშვნელოვანი ნივთიერებების გამომუშავებაში

ორგანიზმში D ვიტამინის დეფიციტი საკმაოდ გავრცელებული პრობლემაა. ამ დროს კი, D ვიტამინი გადამწყვეტ როლს ასრულებს როგორც ძვლების სიმტკიცისა და ჯანმრთელობის შენარჩუნებაში, ისე იმუნური სისტემის სიძლიერესა და კუნთების გამართულ მუშაობაში.

ფოტო: SciTechDaily

მზის სხივების ერთ-ერთი მთავარი უპირატესობა სწორედ ის არის, რომ მას ორგანიზმში D ვიტამინის წარმოქმნის დაწყება შეუძლია. მართალია, D ვიტამინის მიღება გარკვეული საკვები პროდუქტებიდანაცაა შესაძლებელი, თუმცა ადამიანების უმეტესობა ამ ვიტამინის საჭირო რაოდენობას მხოლოდ კვებით ვერ იღებს.

აუმჯობესებს ძილის ხარისხს

ფოტო: UND

მზის დახმარებით გამომუშავებული ჰორმონი სეროტონინი მონაწილეობს კიდევ ერთი ჰორმონის — მელატონინის წარმოქმნაშიც, რომელიც პირდაპირ მოქმედებს ძილზე. როდესაც ორგანიზმში სეროტონინის დონე დაბალანსებულია, დიდია ალბათობა, რომ მელატონინის მაჩვენებელიც მოწესრიგდეს, რაც უფრო მშვიდ ძილს ნიშნავს.

დილით მიღებული მზის სხივები დღის განმავლობაში სიფხიზლეს, საღამოს კი მოთენთილობას და ადვილად დაძინებას იწვევს. თუმცა, თუ ძილის წინ ორი საათით ადრე კაშკაშა შუქის ქვეშ მოხვდებით, ორგანიზმს საპირისპირო რეაქცია ექნება — ჩაძინება გაგირთულდებათ.

მთავარია, ზომიერება დაიცვათ და მზის ქვეშ ზედმეტად დიდხანს დარჩენას მოერიდოთ.

მიუხედავად ამდენი სარგებლისა, მზესთან ურთიერთობისას სიფრთხილის დაცვაც აუცილებელია. ულტრაიისფერი გამოსხივების ჭარბმა დოზამ შესაძლოა კანის დაზიანება, ნაადრევი დაბერება და ლაქების გაჩენა გამოიწვიოს. ამ უარყოფითი ეფექტებისგან თავის დასაცავად მზისგან დამცავი კრემი და მზის სათვალე შეგიძლიათ გამოიყენოთ.