ხშირად ავტოპროდუქტების ონლაინ შერჩევა მომხმარებლებისთვის სირთულეს წარმოადგენს, განსაკუთრებით მაშინ, როცა არჩევანი მრავალფეროვანია და დეტალები ტექნიკურ ცოდნას მოითხოვს. სწორედ ამ გამოწვევის საპასუხოდ შეიქმნა ავტოსფეროში პირველი AI მრჩეველი — დემე, ციფრული ასისტენტი, რომელიც ამბოლის მომხმარებლებს ავტოპროდუქტების სწორად და მარტივად შერჩევაში დაეხმარება.

ვრცლად “დემეს” შესახებ ამბოლის ECommerce მიმართულების ხელმძღვანელი, დევი ციხისელი გაგვესაუბრა:

amboli.ge-ზე დაემატა Ai მრჩეველი — “დემე”, რომელიც ამიერიდან მომხმარებლებს გაუწევს დახმარებას. პირველ რიგში, რამ განაპირობა მისი შექმნა?

ამბოლის ერთ ერთი მთავარი ფილოსოფია მომხმარებლისთვის ბარიერების შემცირებაა და ჩვენ კარგად გვესმის, რომ დღეს Ecommerce აღარ არის მხოლოდ „კალათაში დამატების“ ღილაკი. ავტონაწილების ონლაინ ყიდვა მომხმარებლისთვის ხშირად სტრესთან და შიშთან ასოცირდება - რომ არასწორ ნაწილს შეარჩევს, ან ვერ გაერკვევა ტექნიკურ დეტალებში.

"დემე" შევქმენით სწორედ ამ ბარიერის მოსახსნელად. ჩვენი მიზანი იყო, მომხმარებლისთვის მიგვეცა არა უბრალოდ საძიებო სისტემა, არამედ პერსონალური ასისტენტი, რომელიც 24/7-ზე მზადაა, ნებისმიერ კითხვაზე გასცეს პასუხი. გვინდოდა, რომ ონლაინ შოპინგი ისეთივე უპრობლემო ყოფილიყო და ამავდროულად სანდო, როგორც ჩვენს ფილიალში პროფესიონალ კონსულტანტთან საუბარი, თუმცა — სახლიდან გაუსვლელად.

როგორ ამარტივებს “დემე” ბრენდის მომხმარებლებთან კომუნიკაციას?

"დემეს" კომუნიკაცია სრულიად ახალ დონეზე გადაჰყავს. ის არ არის სტანდარტული ბოტი, რომელსაც წინასწარ გაწერილი შაბლონური პასუხები აქვს. მასთან საუბარი ისეთივე ბუნებრივია, როგორც მეგობართან მიმოწერისას. მომხმარებელს აღარ სჭირდება კატალოგის გვერდიდან გვერდზე გადასვლა ან ტექნიკური ჟარგონების ცოდნა. საკმარისია უბრალოდ მიწეროს "დემეს": "მჭირდება ზეთი ჩემი მანქანისთვის“ და პროცესი იწყება. "დემე" მყისიერად რეაგირებს, არ ალოდინებს მომხმარებელს ხაზზე და, რაც მთავარია, ზუსტად ესმის კონტექსტი, რაც დროის დაზოგვის საუკეთესო საშუალებაა.

რა ტიპის ინფორმაციის მიწოდება შეუძლია “დემეს” მომხმარებლებისთვის?

თამამად შემიძლია ვთქვა, რომ "დემე" ჩვენი ყველაზე ინფორმირებული თანამშრომელია. მისი ცოდნა ორ მთავარ მიმართულებას მოიცავს:

• შიდა ინფორმაცია: მას აქვს წვდომა ჩვენს სრულ ბაზაზე, იცის ყველაფერი პროდუქციის მარაგებზე, ფასებზე, ფილიალების სამუშაო გრაფიკსა და ლოკაციებზე.
• ტექნიკური საკითხები: მას შეუძლია დეტალურად აგიხსნათ კონკრეტული პროდუქტის მახასიათებლები, შეგირჩიოთ ალტერნატივები და მოგცეთ რჩევები ავტომობილის მოვლასთან დაკავშირებით.

მოკლედ რომ გითხრათ, მას შეუძლია დაგეხმაროთ ყველაფერში, დაწყებული კითხვით "სად არის უახლოესი ფილიალი?“, დამთავრებული რთული ტექნიკური ხასიათის შეკითხვით "რომელი აკუმულატორი ჯობია ჰიბრიდული ძრავისთვის?“.

როგორია პროცესი — სად იპოვის მომხმარებელი “დემეს”?

"დემე" Amboli.ge-ს ნებისმიერ გვერდზე, ქვედა მარჯვენა კუთხეში ცხოვრობს და მუდმივად მზად არის, დაგეხმაროთ.

პროცესი მაქსიმალურად მარტივია: მომხმარებელი ხსნის ჩათს და სვამს კითხვას. ყველაზე ხშირად კი დახმარება პროდუქციის შერჩევაში გვჭირდება. სწორედ აქ გთავაზობთ დამატებით სიახლეს, პროდუქციის VIN კოდით ძიებას. მომხმარებელი აგზავნის VIN კოდს (ან უბრალოდ მანქანის მარკას და მოდელს), "დემე" ამუშავებს მონაცემებს და წამებში უგზავნის ზუსტად იმ პროდუქტების ლინკებს, რომლებიც ამ კონკრეტულ მანქანას ერგება.

როგორია “დემეს” ტექნიკური მახასიათებლები და როგორ ახერხებს მომხმარებელს გაუმარტივოს შერჩევის პროცესი?

მინდა აღვნიშნო, რომ ამ ნაწილით განსაკუთრებით ვამაყობთ. "დემე" დაფუძნებულია უახლეს LLM ტექნოლოგიაზე, კერძოდ ChatGPT-ის ბაზაზე. ეს ნიშნავს, რომ მას აქვს ინტელექტი და არა უბრალოდ მონაცემთა ბაზა.

მისი უნიკალურობა იმაშია, რომ ის აერთიანებს ორ სამყაროს: "ამბოლის“ შიდა კატალოგს და გლობალური ინტერნეტის უზარმაზარ ცოდნას. როდესაც მომხმარებელი ინტერესდება კონკრეტული ბრენდით ან ნაწილით, "დემე" ინფორმაციას აჯამებს როგორც ჩვენი მონაცემებიდან, ისე - ღია ინტერნეტ სივრციდან. ის აანალიზებს თავსებადობას, მწარმოებლის რეკომენდაციებს და მომხმარებელს აწვდის გადამოწმებულ, კომპეტენტურ პასუხს. ეს ტექნოლოგიური სინქრონიზაცია გამორიცხავს შეცდომებს და მომხმარებელს აძლევს გარანტიას, რომ შერჩეული ნაწილი ნამდვილად გამოადგება.

როგორია სამომავლო გეგმა და “დემეს” განვითარების პროცესი?

“დემე“ ჯერ მხოლოდ სწავლის პროცესშია, თუმცა შედეგები უკვე შთამბეჭდავია. ჩვენი გუნდი ყოველდღიურად აკვირდება ინტერაქციებს და მუდმივად ვცდილობთ, დავხვეწოთ.

სამომავლოდ ვგეგმავთ ფუნქციონალის კიდევ უფრო გაფართოებას. გვინდა, რომ “დემე” გახდეს კიდევ უფრო პროაქტიული. მაგალითად, შეახსენოს მომხმარებელს ზეთის შეცვლის დრო, ან სეზონური საბურავების შეცვლა. ასევე, ვმუშაობთ იმაზე, რომ მან შეძლოს ვიზუალური ინფორმაციის (ფოტოების) დამუშავებაც, რაც კიდევ უფრო გაამარტივებს დიაგნოსტიკისა და ნაწილის მოძიების პროცესს.