აშშ-ის ვიცეპრეზიდენტ ჯეი დი ვენსის ერევანში ვიზიტისას, აშშ-მა და სომხეთმა მშვიდობიანი ბირთვული თანამშრომლობის შესახებ ერთობლივ განცხადებას მოაწერეს ხელი და დრონების შესყიდვის შეთანხმება დაასრულეს.

ეს შეთანხმებები მნიშვნელოვან ნაბიჯს წარმოადგენს ორმხრივი ურთიერთობების გაღრმავების გზაზე — სომხეთი ენერგორესურსების დივერსიფიკაციას და თავდაცვის შესაძლებლობების გაძლიერებას ცდილობს. ამის შესახებ ინფორმაციას უცხოური მედია ავრცელებს.

პრემიერმინისტრმა ნიკოლ ფაშინიანმა განაცხადა, რომ ეს პაქტი ენერგეტიკული პარტნიორობის ახალ თავს ხსნის და ბირთვული უსაფრთხოების სფეროში მრავალწლიანი მხარდაჭერისთვის აშშ-ს მადლობა გადაუხადა, რაც, მისი თქმით, სომხეთის ენერგომიქსის დივერსიფიკაციისკენ გადადგმული ნაბიჯია.

ენერგეტიკულ შეთანხმებასთან ერთად ფაშინიანმა გამოაცხადა, რომ, აშშ-ის საგარეო სამხედრო გაყიდვების (Foreign Military Sales) პროგრამის ფარგლებში, სომხეთი V-BAT ტიპის სადაზვერვო დრონებს შეიძენს. ვენსის თქმით, შეთანხმების ღირებულება 11 მილიონ დოლარს შეადგენს და ეს დრონები ქვეყანას უსაფრთხოების უზრუნველყოფასა და მშვიდობის განმტკიცებაში დაეხმარება. მან ასევე აღნიშნა, რომ ეს გარიგება მხარს უჭერს აშშ-ში სამუშაო ადგილების შექმნას და ინვესტიციებს თავდაცვითი ტექნოლოგიების სექტორში.

შეგახსენებთ, ამერიკის ვიცეპრეზიდენტი, ჯეი დი ვენსი სომხეთში ოფიციალური ვიზიტით 9 თებერვალს ჩავიდა. სომხეთის შემდეგ აშშ-ის ვიცე-პრეზიდენტი აზერბაიჯანში გაემგზავრება, სადაც ვიზიტი 10-11 თებერვალსაა დაგეგმილი.