Netflix-ის ჰიტმა ანიმაციურმა ფილმმა საბოლოოდ წარადგინა Mattel-ისა და Hasbro-ს სათამაშოების ხაზები, რომლებიც მოიცავს თოჯინებს, სამაგიდო თამაშებს და ბევრ სხვა რამეს.

სათამაშოების მწარმოებელმა კომპანიებმა პროდუქცია ნიურნბერგის სათამაშოების გამოფენაზე წარმოადგინეს. კოლექციაში შედის ახალი თოჯინები, ფიგურები, საკოლექციო ნივთები, სამაგიდო თამაშები და როლური თამაშის ელემენტები — ყველაფერი პოპულარული ანიმაციური ფილმის მიხედვით არის შექმნილი.

როგორც მოსალოდნელი იყო, Mattel-ის ხაზში შედის თოჯინები, ექშენ-ფიგურები, თამაშები და საკოლექციო ნივთები. მათ შორისაა American Girl-ის სპეციალური კოლექცია, რომელიც ფილმის მთავარი ტრიოს, რუმის, ზოის და მირას, ინდივიდუალურ თოჯინებს აერთიანებს. თითოეული თოჯინა შთაგონებულია პერსონაჟების ეკრანული ვიზუალით და ხასიათით, დეტალური აქსესუარებით და სტილით, რომელიც ფილმის მოდას, მუსიკასა და განწყობას ასახავს.

Mattel-მა ასევე შექმნა თოჯინები ფილმში ნაჩვენები პირველი მოდური ლუქებით, მომღერალი თოჯინები ჯგუფის სასცენო კოსტიუმებით, ასევე ექშენ-ფიგურები, საკოლექციო თოჯინები და ბრელოკები Huntrix-ის, ბიჭების ჯგუფის — Saja Boys-ის და სხვა პერსონაჟების, მათ შორის ფანების ფავორიტის, დერპის, მიხედვით. დამატებით, კომპანია უშვებს UNO-ს სპეციალურ ვერსიას, Polly Pocket-ის საკოლექციო ნივთებს და Little People Collector-ის სეტებსაც, რომლებიც ფილმის სამყაროთია შთაგონებული.

Hasbro-მ წარმოადგინა NERF-ის სათამაშოები, რომლებიც Huntrix-ის დემონებთან ბრძოლის იარაღებზეა დაფუძნებული, ასევე ორი Furby Furblet. ერთ-ერთი Furblet შექმნილია Derpy Tiger-ის მიხედვით — პერსონაჟის, რომელიც განსაკუთრებით პოპულარულია ონლაინ, როგორც ბავშვებში, ისე უფროსებში. მეორე კი ფილმის რთული ხასიათის მთავარი გმირის, ჯინუს მიხედვითაა შექმნილი, რომელიც ბიჭების ჯგუფის Saja Boy-ის წევრია. თითოეულ Furby-ს აქვს 45-ზე მეტი ინტერაქტიული ხმა, თემატური აქსესუარები და საკიდი ბრელოკები.

კომპანიამ ასევე გამოუშვა ფილმში წარმოდგენილი ორი K-Pop ჯგუფით შთაგონებული მანათობელი ჯოხები, ისინი ანათებენ და სინქრონულად მუშაობენ "კონცერტის სტილში" გასართობად, რაც ფანებს საშუალებას აძლევს, ფილმის ყურებისას ერთად იმღერონ.

გზაშია ასევე KPop Demon Hunters-ის მონოპოლის ვერსია, რომელიც მოთამაშეებს მისცემს შანსს "ივარჯიშონ, ებრძოლონ დემონებს, მოიგონ ჯილდოები და კონკურენცია გაუწიონ ერთმანეთს".

KPop Demon Hunters ნეტფლიქსის ისტორიაში ყველაზე პოპულარულ პროექტად იქცა. სიუჟეტი მოგვითხრობს Huntrix-ის თავგადასავალს — სამი წევრისგან შემდგარი K-Pop ბენდის შესახებ, რომლებიც პარალელურად ქვესკნელიდან მოსულ მონსტრებს ებრძვის. Netflix-ის ჩარტების ლიდერობასთან ერთად, ფილმის საუნდტრეკი რამდენიმე კვირის განმავლობაში Billboard 200-ის ტოპ 10-ში იყო, ხოლო სიმღერა Golden Billboard Hot 100-ის პირველ ადგილზე მოხვდა.

აგვისტოში The Hollywood Reporter-მა პირველად გაავრცელა ინფორმაცია, რომ გაგრძელებაზე მოლაპარაკებები მიმდინარეობს Netflix-სა და Sony Animation-ს შორის, მოგვიანებით კი დადასტურდა, რომ რეჟისორებმა და სტუდიამ სტრიმინგ პლატფორმასთან მომდევნო ნაწილზე შეთანხმება გააფორმეს.

ანიმაციურმა ფილმმა ამ თვეში ორი ოქროს გლობუსი მოიგო, ხოლო გასულ კვირას ოსკარის ორი ნომინაციაც მიიღო — საუკეთესო ანიმაციური ფილმისა და ორიგინალური სიმღერის კატეგორიებში.

სათამაშოების ხაზის ზუსტი გამოსვლის თარიღი ჯერ არ გამოცხადებულა, გარდა American Girl-ის KPop Demon Hunters-ის კოლექციისა, რომელიც ბრენდის ოფიციალურ ვებგვერდზე უკვე ხელმისაწვდომია წინასწარი შეკვეთით.