სურსათის ეროვნულმა სააგენტომ (სეს) იმერეთში ყველის არალეგალური საწარმოები გამოავლინა, რომელთაგან ერთი ფიზიკური პირი, ეკონომიკურ საქმიანობათა რეესტრში რეგისტრაციისა და სურსათის ეროვნული სააგენტოს აღიარების გარეშე, სანიტარიულ-ჰიგიენური ნორმების და მიკვლევადობის მოთხოვნების დარღვევით საქმიანობდა.

მეორე საწარმო — შპს "რაგო" კი სეს-ის აღიარების გარეშე მუშაობდა და მიკვლევადობის მოთხოვნებს არ იცავდა. როგორც გავრცელებული განცხადებიდან ვიგებთ, სააგენტოს ორივე ბიზნესოპერატორი დაჯარიმდა და ორივე მათგანს შეუჩერდა საწარმოო პროცესი.

"სურსათის ეროვნული სააგენტოს იმერეთის დეპარტამენტის ინსპექტორებმა წყალტუბო მუნიციპალიტეტის სოფელ გეგუთში ყველის გადამმუშავებელი არალეგალური საწარმო გამოავლინეს. ფიზიკური პირი ეკონომიკურ საქმიანობათა რეესტრში რეგისტრაციისა და სურსათის ეროვნული სააგენტოს აღიარების გარეშე საქმიანობდა. შემოწმებისას დადგინდა, რომ საწარმოში დარღვეული იყო სანიტარიულ-ჰიგიენური ნორმები და მიკვლევადობის მოთხოვნები. კანონმდებლობის შესაბამისად, ბიზნესოპერატორი დაჯარიმდა და საწარმოო პროცესი შეუჩერდა.

დარღვევები დაფიქსირდა ყველის გადამმუშავებელ საწარმო შპს "რაგოშიც” (ს/კ 419617258; მისამართი: ტყიბულის მუნიციპალიტეტი, სოფელი სამტრედია). ბიზნესოპერატორი საქმიანობდა სურსათის ეროვნული სააგენტოს აღიარების გარეშე, არ იცავდა მიკვლევადობის მოთხოვნებს, რის გამოც დაჯარიმდა და შეუჩერდა საწარმოო პროცესი.

სურსათის ეროვნული სააგენტო კიდევ ერთხელ მოუწოდებს ბიზნესოპერატორებს, დროულად განაახლონ რეგისტრაცია ეკონომიკურ საქმიანობათა რეესტრში და, საჭიროების შემთხვევაში, მიიღონ სააგენტოს აღიარება.

სურსათის ეროვნული სააგენტო სახელმწიფო კონტროლს მთელი ქვეყნის მასშტაბით უწყვეტ რეჟიმში ახორციელებს", — წერია სურსათის ეროვნული სააგენტოს მიერ გავრცელებულ განცხადებაში.