დროის საუკეთესო კაფსულა მუსიკაა. არაფერი ისე არ აღვიძებს მოგონებებსა თუ ნოსტალგიას, როგორც წლების წინ მოსმენილი სიმღერები — მით უფრო, თუ კარგა ხანია, აღარ ჩაგირთავს. თუმცა, ხშირად დაუჯერებელიც კია, რომ ჩვენი საყვარელი სიმღერების თუ ალბომების გამოსვლიდან ამდენი დრო გავიდა (გავიდა, გავიდა). აი, თუნდაც, როგორ გინდა, გაიაზრო, რომ ამ ათი სიმღერის გამოსვლიდან წელს მთელი ათწლეული იქნება გასული...

1. ლედი გაგას Million Reasons

2016 წლის ერთ-ერთი მთავარი მუსიკალური მოვლენა ლედი გაგას ახალი, რიგით მე-4 სტუდიური ალბომი Joanne გახლდათ, რომელიც პოპვარსკვლავის ძველი ჩანაწერებისგან დიდად განსხვავდება. სწორედ ამ ალბომში შემავალი სინგლი იყო Million Reasons, რომელიც მაშინ დონატელა ვერსაჩეს საყვარელი სიმღერაც კი გახდა.

2. ჯასტინ ტიმბერლეიკის Can't Stop the Feeling!

სანამ ლედი გაგა შემოდგომაზე დაგვასევდიანებდა, მთელი ზაფხული ჯასტინ ტიმბერლეიკის მორიგმა ჰიტმა გვაცეკვა. Can't Stop the Feeling! ანიმაციური ფილმის, Trolls-ის, საუნდტრეკი იყო. ჯასტინმა სიმღერა 2016 წლის ევროვიზიის ფინალშიც შეასრულა.

3. კელვინ ჰარისის და რიანას This Is What You Came For

ვინც ტიმბერლეიკზე არ ცეკვავდა, მას უთუოდ კელვინ ჰარისის და რიანას სიმღერა ჰქონდა 24/7-ზე ჩართული. This Is What You Came For-ს დღეს უკვე ისეთი ნოსტალგიური ჟღერადობა აქვს, ჩართვისთანავე 2016-ში დაგაბრუნებს. სხვათა შორის, ბევრმა დღემდე არ იცის, რომ სიმღერა ტეილორ სვიფტის დაწერილია, რომელმაც მაშინ ამჯობინა, ფსევდონიმის მიღმა დამალულიყო.

4. ალან უოკერის Alone

ელექტრონულ მუსიკას 2016-ში ნამდვილი ოქროს ხანა ედგა. ამის ერთ-ერთი დასტურია Alone, რომელსაც მაშინ ჯერ კიდევ ახალბედა ალან უოკერის გულშემატკივრები მოუთმენლად ელოდნენ. სიმღერამ ნორვეგიელი მუსიკოსის 2015 წლის ტრეკის, Faded-ის, უსაზღვრო წარმატება გაიმეორა და უამრავი ქვეყნის ჩარტებში აღმოჩნდა.

5. The Chainsmokers-ის Don't Let Me Down

ესეც კიდევ ერთი დასტური, როგორ ჰყვაოდა ელექტრონული მუსიკა 2016 წელს. დუეტ The Chainsmokers-ის ამ სიმღერამ გრემის ჯილდო დაიმსახურა და მოგვიანებით ამერიკის ხმისჩამწერი კომპანიების ასოციაციისგან (RIAA) ბრილიანტის სტატუსიც მიიღო.

6. Twenty One Pilots-ის Heathens

რაოდენ დაუჯერებელიც უნდა იყოს, Suicide Squad-ის ეკრანებზე გამოსვლიდანაც 10 წელი გასულა. სწორედ DC Comics-ის ამ ფილმის საუნდტრეკი იყო Heathens, გრემიზე სამგზის ნომინირებული სიმღერა, რომელმაც აშშ-ში ბილბორდის ასეულის ჩარტში მეორე პოზიციას მიაღწია.

7. შაკირას Try Everything

2016-ის ჩარტებში სწორედ ფილმების ან ანიმაციების საუნდრეკები ლიდერობდა, რაც გასაკვირი არ უნდა იყოს, თუ გავიხსენებთ, როგორი წარმატებული იყო ეს წელი ჰოლივუდისთვის. სწორედ 2016-ში გამოვიდა ათწლეულის ერთ-ერთ ყველაზე მაღალშემოსავლიანი ანიმაცია ზოოტოპია. ფილმში ერთ-ერთი პერსონაჟი, არც მეტი, არც ნაკლები, შაკირამ გაახმოვანა და სწორედ მან შეასრულა საუნდრეკის მთავარი სიმღერა Try Everything, რომელიც, სხვათა შორის, სიას დაწერილია.

8. P!nk-ის Just Like Fire

ესეც მორიგი სიმღერა 2016 წლის ჰოლივუდის საუნდტრეკიდან. ვის თუ არა ფინქს უნდა შეესრულებინა სიმღერა ისეთი ექსცენტრიკული ფილმისთვის, როგორიც იყო ელისი სარკის მიღმა, სადაც მთავარი როლები ჯონი დეპმა, ენ ჰეთეუეიმ, ჰელენა ბონემ კარტერმა და საშა ბარონ კოენმა შეასრულეს.

9. ბრუნო მარსის 24K Magic

2010-იანები ბრუნო მარსის გარეშე წარმოუდგენელია. ამერიკელმა მომღერალმა ფანები 2016-შიც არ გააწბილა და მესამე სტუდიური ალბომი 24K Magic შემოგვთავაზა; ამავე სახელწოდებას ატარებს ალბომის მთავარი სინგლი, რომელსაც განსაკუთრებული კომერციული წარმატება RIAA-ის ხუთგზის პლატინის სტატუსი ხვდა წილად.

10. არიანა გრანდეს Into You

დაბოლოს: წინა ათწლეული არიანა გრანდემაც განსაზღვრა და ამის ერთ-ერთი მტკიცებულება მუსიკოსის მესამე სტუდიური ალბომი Dangerous Woman გახლავთ, რომლის გამოსვლიდან მთელი ათი წელი გავიდა. და თუ რომელიმე მელოდიას ვერ ვიგდებდით თავიდან 2016-ში, ეს ნამდვილად Into You იყო.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...