აშშ-ს პრეზიდენტმა, დონალდ ტრამპმა აშშ-ში საქონლის ექსპორტიორ რამდენიმე ქვეყანაზე ტარიფების ახალი რაუნდის შესახებ გამოაცხადა, რომელიც 1-ელი თებერვლიდან ამოქმედდება.

ტრამპმა განაცხადა, რომ ეს ტარიფები ძალაში იქნება მანამ, სანამ აშშ-ს მიერ "გრენლანდიის სრული შეძენის შესახებ შეთანხმებას არ მიაღწევს".

სოციალურ ქსელ TruthSocial-ზე აშშ-ს პრეზიდენტმა დაწერა, რომ ისეთ ქვეყნებზე, როგორიცაა დანია, ნორვეგია, შვედეთი, საფრანგეთი, გერმანია, დიდი ბრიტანეთი, ნიდერლანდები და ფინეთი, აშშ-ში ექსპორტზე 10%-იანი ტარიფი დაეკისრებათ.

"2026 წლის 1 თებერვლიდან ყველა ეს ქვეყანა — დანია, ნორვეგია, შვედეთი, საფრანგეთი, გერმანია, დიდი ბრიტანეთი, ნიდერლანდები და ფინეთი — აშშ-ში გაგზავნილ ყველა საქონელზე 10%-იან ტარიფს გადაიხდის", — განაცხადა ტრამპმა და დასძინა, რომ 1-ელი ივნისიდან ტარიფი 25%-მდე გაიზრდება.

აშშ-ს პრეზიდენტის თქმით, დანია, ნორვეგია, შვედეთი, საფრანგეთი, გერმანია, გაერთიანებული სამეფო, ნიდერლანდები და ფინეთი "გრენლანდიაში უცნობი მიზნებით ჩამოვიდნენ“ და „ძალიან სახიფათო თამაშს" თამაშობენ.

"ამ პოტენციურად საშიში სიტუაციის სწრაფად და უპირობოდ გადაწყვეტის უზრუნველსაყოფად მკაცრი ზომები უნდა იქნას მიღებული", — დასძინა ტრამპმა.

ევროკავშირმა კვირას, საღამოს 5:00 საათზე (16:00 GMT) ბრიუსელში საგანგებო შეხვედრა მოიწვია. Reuters-ის ცნობით, შეხვედრას ევროკავშირის 27 წევრი სახელმწიფოს წარმომადგენლები დაესწრებიან.

ამ ფონზე, გრენლანდიამ და დანიამ კიდევ ერთხელ დაადასტურეს, რომ კუნძული არ იყიდება.

ხუთშაბათს, ევროპულმა ქვეყნებმა გრენლანდიაში მცირე რაოდენობის ჯარისკაცები გაგზავნეს, რადგან დანიამ განაცხადა, რომ აპირებს კუნძულზე "უფრო დიდი და მუდმივი" NATO-ს წარმომადგენობა იყოს.

ევროპის დაგეგმილი სამხედრო ძალების მასშტაბები არ გახმაურებულა. ჯერჯერობით, კუნძულზე მხოლოდ რამდენიმე ათეული ჯარისკაცი გაიგზავნა, რათა დანიას სამხედრო წვრთნებისთვის მომზადებაში დაეხმაროს. თუმცა, ეს ჟესტი, რომელიც აშშ-ს, დანიისა და გრენლანდიის წარმომადგენლებს შორის ჩიხიდან გამოსვლიდან სულ რაღაც ერთი დღის შემდეგ გაკეთდა, ევროპული სოლიდარობის მკაფიო სიგნალს წარმოადგენს.

საფრანგეთმა, შვედეთმა, გერმანიამ, დიდმა ბრიტანეთმა და ნორვეგიამ წვრთნებში მონაწილეობის შესახებ განაცხადეს, მოგვიანებით კი მათ ნიდერლანდები შეუერთდა.

აშშ-ის პრეზიდენტი დონალდ ტრამპი ამტკიცებს, რომ ვაშინგტონს გრენლანდიის შეძენა ეროვნული უსაფრთხოების მიზნით სჭირდება და არ გამორიცხავს სამხედრო ძალის გამოყენებას.