21 ოქტომბრის არჩევნებისთვის დღეიდან საარჩევნო ბიულეტენების ბეჭდვა დაიწყება. ცესკოს სპიკერმა ანა მიქელაძემ განაცხადა, რომ ბიულეტენების ბეჭდვის პროცესი რამდენიმე დღე გაგრძელდება და მას ცენტრალური საარჩევნო კომისიის წევრებთან ერთად, დააკვირდება ორი საერთაშორისო და ექვსი ადგილობრივი სადამკვირვებლო ორგანიზაციის ოცი დამკვირვებელი.

სულ 9 546 450 ბიულეტენი დაიბეჭდება. 21 ოქტომბერს საარჩევნო უბანზე ამომრჩეველს სამი სახის ბიულეტენი გადაეცემა:

  • ცისფერი ფერის ბიულეტენი განკუთვნილია პროპორციული არჩევნებისთვის პარტიის ან საარჩევნო ბლოკის ასარჩევად;
  • ვარდისფერი ბიულეტენი - საკრებულოს მაჟორიტარი წევრის ასარჩევად;
  • ღია მწვანე ფერის ბიულეტენი - თვითმმართველი ქალაქის ან თვითმმართველი თემის მერის ასარჩევად.

ადგილობრივ მაჟორიტარულ ოლქებში კანდიდატების ასარჩევად 1088 მაჟორიტარული განსხვავებული სახის ბიულეტენი დაიბეჭდება. ასევე, 64 სახის სხვადასხვა პროპორციული სიის და თვითმმართველი ქალაქისა და თემის მერის არჩევნებისათვის 64 განსხვავებული სახის ბიულეტენი.

ანა მიქელაძის თქმით ბიულეტენები ეთნიკური უმცირესობების ენებზეც დაიბეჭდება - ქართულ-აზერბაიჯანულ და ქართულ-სომხურ ენებზე.

"ქართულ-აზერბაიჯანულ ენებზე ბიულეტენები მიეწოდება 208 საარჩევნო უბანს, ხოლო ქართულ-სომხურ ენებზე - 133 საარჩევნო უბანს. ასევე, ოთხი საარჩევნო უბნისთვის დაიბეჭდება სამენოვანი ბიულეტენები (ქართულ-აზერბაიჯანულ-სომხურ ენებზე)".

2017 წლის თვითმმართველობის არჩევნებისთვის ამომრჩეველთა ერთიან სიაში საერთო ჯამში რეგისტრირებულია 3 440 123 ამომრჩეველი.