საკუთარ თავს და შეგრძნებებს თუ ხშირად აკვირდები, აუცილებლად შეამჩნევდი, როგორ იცვლება ხასიათი, როცა დაღლილი ისეთ ოთახში აღმოჩნდები, რომელშიც დომინანტი ფერი მწვანეა. წითელი ალბათ განგაშის შეგრძნებას იწვევს შენში, ლურჯი — გამშვიდებს.

ფერებთან დაკავშირებული ეს შეგრძნებები შემთხვევითი არ არის. კი, ყველაფერი ჩვენს წარმოსახვაში ხდება, მაგრამ ამის უკან მეცნიერული მტკიცება დგას — ფერის ფსიქოლოგია.

ამ ბლოგში მარტივად აგიხსნი, როგორ მოქმედებს სხვადასხვა ფერი ჩვენს ქცევებსა და ემოციებზე და იმასაც გასწავლი, ეს ცოდნა შენს სასიკეთოდ როგორ გამოიყენო.

ფერების "შპარგალკა"

მოკლედ გეტყვი, ქვემოთ ჩამოთლილი ძირითადი ფერები რა სიგნალს უგზავნის შენს ტვინს:

• წითელი — პულსს აჩქარებს და მოქმედების სურვილს აღძრავს;
• ლურჯი — არტერიულ წნევას ამცირებს, გამშვიდებს და სუნთქვას აადვილებს;
• ყვითელი — დოფამინის გამოყოფას უწყობს ხელს და ბედნიერების შეგრძნებას აჩენს;
• მწვანე — ჩვენი თვალი მას ბუნებასთან აკავშირებს და შესაბამისად, გვამშვიდებს;
• იასამნისფერი — იდუმალებასთან ასოცირდება და შემოქმედებით აზროვნებას უწყობს ხელს.

როგორ გამოვიყენოთ ეს ცოდნა ჩვენს სასიკეთოდ?

ცხოვრების დიდ ნაწილს შენობებში ვატარებთ — სახლში, სამსახურში. ამიტომ, მნიშვნელოვანია, გარემო ისე მოვაწყოთ, რომ ნერვულ სისტემას სწორი და საჭირო სიგნალები გავუგზავნოთ.

მაგალითად, თუ დაღლის შეგრძნება არასდროს გტოვებს, სახლში ან იმ გარემოში, სადაც ხშირად ხარ, შესაძლოა, წითელი ფერი ჭარბობდეს. ეს ფერი სხეულს მუდმივად განგაშის რეჟიმში ამყოფებს.

ფერების გააზრებული შერჩევით შეძლებ:

1. მოიწესრიგო ძილი: საძინებლისთვის შედარებით ცივი ტონების შერჩევა (ლურჯი, ნაცრისფერი) ტვინს დასვენებაში ეხმარება.
2. გახდე უფრო პროდუქტიული: სამუშაო სივრცეში მწვანე ან რბილი ცისფერი დეტალები ყურადღების შენარჩუნებას გაგიიოლებს.

იმისათვის, რომ ფერებმა შენს სასარგებლოდ იმუშაოს, სახლის მთლიანი რემონტი არ დაგჭირდება, ამისკენ არ გიბიძგებ. მცირე დეტალებსაც კი დადებითი ეფექტი აქვს ხოლმე: სწორად შერჩეული ფონი კომპიუტერის ეკრანისთვის, რომლის წინაც ამდენ დროს ვატარებთ, ყავის ყვითელი ჭიქა და ლურჯი ბალიში სავარძელზე ან თბილი განათება, წარმოუდგენლად მყუდროს გახდის გარემოსაც და მენტალურ ჯანმრთელობაზეც კარგად აისახება.

და გახსოვდეს — "არასწორი" ფერი არ არსებობს. ეს თეორიები კი კარგია და მათი ცოდნაც სასარგებლო, მაგრამ ყველაზე მნიშვნელოვანი მაინც შენი შეგრძნებებია. თუ ყველა გეუბნებათ, რომ ლურჯი ამშვიდებს, შენ კი შფოთვის შეგრძნებას გიჩენს — ნუ გამოიყენებ მას! ყოველთვის საკუთარ სხეულს და შეგრძნებებს უსმინე.