კახა კალაძის თქმით, არაფერია იმაში ცუდი, რომ კალათბურთელმა გიორგი შერმადინმა თავისი სანაკრებო კარიერის ბოლო მატჩის დასრულების შემდეგ მადლობა ოცნების პრემიერმინისტრ ირაკლი კობახიძესაც გადაუხადა.

კალაძე აცხადებს, რომ ბოლო წლებში ოცნების ხელისუფლებამ ბევრი გააკეთა სპორტის მიმართულებით და ამის შედეგია სპორტის სხვადასხვა სახეობაში მიღწეული წარმატებები.

"ცუდი რა არის იმაში, როდესაც სპორტსმენი გამოხატავს მადლიერებას სახელმწიფოს მიმართ. ბოლო წლების განმავლობაში სახელმწიფომ სპორტის მიმართულებით ძალიან ბევრი კარგი საქმე გააკეთა. თქვენ როგორ ფიქრობთ, ის შედეგები რაც მივიღეთ კალათბურთში, ფეხბურთში, ძიუდოში ან სპორტის სხვა სახეობებში, ეს შემთხვევით მოვიდა? ეს ყველაფერი არის ზუსტად იმის შედეგი, რომ სპორტსმენებმა იშრომეს თავდაუზოგავად, მათთვის შეიქმნა შესაბამისი ინფრასტრუქტურა, პირობები. ამას უდიდესი მნიშვნელობა აქვს სპორტსმენისთვის. მაგალითად, ფეხბურთელი რომელიც საზღვარგარეთ რომელიმე კლუბში თამაშობს და თავის ნაკრებში სათამაშოდ ჩამოდის, ფიქრობს მხოლოდ და მხოლოდ ერთ რამეზე — როგორ აჩვენოს თავისი საუკეთესო შესაძლებლობები.

გიორგი შერმადინს მთელი დარბაზი ტაშს უკრავდა. არსებითი მნიშვნელობა არ აქვს 30 ცალი ნაცი რაღაცას თუ გააპროტესტებს. საბედნიეროდ, მსგავსი ადამიანები არიან უმცირესობაში. ხოლო ქვეყნის უმრავლესობა რეალურად ხედავს, რა ხდება, რა პროცესები მიდის, როგორც ქვეყნის შიგნით, ასევე ქვეყნის გარეთ. ლიბერალური ფაშიზმი მსოფლიოში მარცხდება და რა თქმა უნდა, დამარცხებულია საქართველოშიც", — აღნიშნა კახა კალაძემ.

ცნობისათვის, გუშინ ქართველმა კალათბურთელმა გიორგი შერმადინმა თითქმის 20-წლიანი სპორტული კარიერა დაასრულა და გამოსამშვიდობებელ სიტყვაში ოცნების პრემიერმინისტრს ირაკლი კობახიძეს მადლობა გადაუხადა.

"ძალია დიდი მადლობა, მინდა გადავუხადო, ჩვენს სახელმწიფოს, ბატონი პრემიერის მეთაურობით. დიდი მადლობა, ბატონო პრემიერო, რასაც სპორტისთვის აკეთებთ", — თქვა გიორგი შერმადინმა.