თბილისის საკრებულოს თავმჯდომარემ გიორგი ალიბეგაშვილმა საკრებულოს სხდომის დაწყებამდე ჟურნალისტებს უთხრა, რომ საკრებულო იმსჯელებს და ეცდება, კონსტრუქციულად მიიღოს ყველა გადაწყვეტილება. თბილისის საკრებულო დღეს განიხილავს ბიძინა ივანიშვილთან დაკავშირებული კომპანიებისთვის, პანორამა თბილისისთვის, თბილისის ცენტრში მიწების ლარად გადაცემის საკითხს.

ალიბეგაშვილმა ასევე გააკრიტიკა ოპოზიცია საკრებულოს შენობის წინ გამართული აქციის გამო, რასაც პოლიციასთან დაპირისპირება მოჰყვა. პოლიციას საკრებულოს შენობა დილიდან ალყაში აქვს მოქცეული და შენობაში შესვლის უფლებას მხოლოდ მედიას, საკრებულოს წევრებსა და თანამშრომლებს აძლევს.

"ოპოზიციურ ჯგუფებს არანაირი სურვილი არ გამოუხატავთ ამ დღეების განმავლობაში, რომ მოსულიყვნენ კომოსიების ფორმატში და განეხილათ ის საკითხი, რომელიც მათ ასე აინტერესებთ. მათ არ უნდოდათ, რომ კონსტრუქციულ რეჟიმში გვემუშავა ჩვენ, ამ დღემდე მოიყვანეს იმისათვის, რათა აი ეს შოუ მოეწყოთ. აქედან გამომდინარე ვაცხადებ, რომ თუ რაიმე სურვილი აქვთ, არის ორი ფრაქცია - ნაციონალური მოძრაობისა და ევროპული საქართველოსი - შეუძლიათ მოისმინონ, იმსჯელონ და არა ასე ზედაპირულად იმსჯელონ იმ საკითხებზე, რომელიც შემოდის საკრებულოში" - თქვა გიორგი ალიბეგაშვილმა.

ჩვენ არავის არ მივცემთ კანონის დარღვევის უფლებას. ვიმოქმედებთ კანონის და საკრებულოს რეგლამენტის მიხედვით

გიორგი ალიბეგაშვილი

მისივე თქმით, პოლიტიკოსებისთვის საკრებულოში შესვლის შეზღუდვის მიზეზი გახდა მათი გაცხადებული მიზანი სხდომის ჩაშლის შესახებ:

"ამას პირდაპირ, დაუფარავად, მთელი მოსახლეობის თვალწინ აკეთებენ. ჩვენ არავის არ მივცემთ კანონის დარღვევის უფლებას. ვიმოქმედებთ კანონის და საკრებულოს რეგლამენტის მიხედვით".

დღეს, 10 ოქტომბერს, თბილისის საკრებულო საქართველოს ყოფილი პრემიერ-მინისტრთან და მმართველი პარტიის დამფუძნებელთან, ბიძინა ივანიშვილთან დაკავშირებული ორი კომპანიისთვის მიწის გადაცემის საკითხს განიხილავს. საუბარია ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთის პირდაპირი განკარგვის ფორმით პრივატიზებაზე.